Meeryn ass Traa dy Liooar, Jelune 25oo Mean Fouyir 2023
Er y chiaghtin, va caa da'n theay clashtyn rish politickeyryn y Reiltys loayrt mychione ny vees goll er jannoo ec yn lught-reill as dy chur feyshtyn as nyn marelyn mychione cooishyn.
Ren yn Shirveishagh Tashtee, as Oltey yn Chiare as Feed son Rhumsaa, yn Fer Lhee Alex Allinson, loayrt mychione imnea bentyn da bishaghey pobble yn Ellan gys cheead thousane dy leih as mychione jannoo ymmyd jeh tashtaghyn freillt dy eeck son claare argidoil y Reiltys.
Ta'n Fer Lhee Allinson gra dy vel plan queig bleeaney dy yannoo ny sloo yn aght ta'n Reiltys ny lhie er tashtaghyn freillt, as dy heet reesht gys claare argidoil cormit. T'eh gra dy vel shen doillee ayns chymmyltaght dy volgey argidoil son peiagh erbee dy chormaghey ny claareyn argidoil oc, vel shen claare argidoil y thie ny ec colught, ny'n chlaare argidoil ashoonagh. T'eh gra nish dy vel y Reiltys cur er rheynnyn er-lheh dy ve freggyrtagh, as cur eab er cur orroo goll syn aght jerkit, ga dy vel fys ec yn lught-reill toiggal dy vel bolgey argidoil as argid faill bishit cur preays er shen.
Ta eear tarmaynagh y Reiltys, John Webster, gra dy vel eh ommidjagh son y Reiltys dy ve ny lhie er jannoo ymmyd jeh argid ass tashtaghyn freillt dy lhieeney y varney eddyr y towse dy argid cheet stiagh veish keeshyn as yn towse vees goll er ceau ec y Reiltys sy chlaare argidoil echey, as sleih cheet er shen myr barney strughtooroil. T'eh gra nagh vel shen ry chummal seose.
Ta Mnr Webster gra dy nee baghtal eh dy vel tashtaghyn freillt caglit, as dy vel mysh billioon punt ec Ellan Vannin, agh mleeaney dy by lickly eh dy jean y Reiltys jannoo ymmyd jeh mysh y wheigoo ayrn jeh shen, mysh daa cheead millioon punt, as dy vel shen dy ghra dy vel barney strughtooroil y Reiltys, vees yn towse t'eh baarail erskyn yn argid cheet stiagh echey, ny keeshyn, daa cheead millioon punt ayns un vlein, as nagh vel shen agh ommidjys.
--ooOoo—
Ta'n Shirveishagh Slaynt as Kiarail y Theay, as Oltey yn Chiare as Feed son Rhumsaa, Lawrie Hooper, gra dy vel eh shaghey yn traa son coloayrtyssyn oney mychione ny shirveishyn ta shin jerkal rish syn Ellan. Va feyshtyn er Mnr Hooper ayns cohaglym y Reiltys mychione rollaghyn faarkee liauyrey son quaaltyssyn sy thie lheiys. Dooyrt un pheiagh dy row eh gennaghtyn dy beagh surransee fakin oanluckeyder roish my row caa daue fakin fer lhee.
Ta Mnr Hooper gra dy vel gaue ayn dy vel shin laccal shirveishyn feer vie, sy chooish shoh ayns yn chirveish claynt, agh er-lesh dy vel shen yn aght neesht ayns ardyn elley sy cherroo theayagh, agh gyn ve arryltagh dy chur argid er nyn son syn aght ta feme orroo, as myr shoh dy vel eh dy feer foddey shaghey yn traa dy row ny coloayrtyssyn shen oney dy liooar rish y cheilley. T'eh gra dy vel fys echey dy vel yn Tashtey fo raad ayns lhiasaghey strateish keesh bentyn da ny cooishyn shoh, as dy nee ynnyd doillee dy ve ayn, agh by hreih eh dy vel shen yn ynnyd ta shin ayn.
Ta Mnr Hooper gra, my vees sleih geearee shirveish claynt jeh'n chied rang, eisht dy vel feme er baih argid aynjee, as dy vel shen y bun eie cheddin as ta ry gheddyn ayns ymmodee shirveishyn elley y cherroo theayagh. T'eh gra ayns rieughid ayns lughtyn-reill elley roish nish nagh haghyr shen, as ayns aght ennagh dy vel shin sy stayd ta shin ayn, as dy vel ad cur eab er cosney magh ass, agh dy nee jurnaa liauyr doillee eh.
Ta Mnr Hooper gra, mannagh vel shin goaill ayns laue y doilleeid shoh nish, as dy nee doilleeid eh as lhisagh sleih v'er n'ghoaill ayns laue eh, ga dy vel eh toiggal dy row Covid beggan ayns raad y lught-reill shoh chaie, agh mannagh vel shin goaill ayns laue y doilleeid shoh nish, dy vel shin cur cooish feer vooar gys y nah heeloghe, as nagh vel eh geearree y ve sy stayd shen.
Yn Shirveishagh Slaynt as Kiarail y Theay, as Oltey yn Chiare as Feed son Rhumsaa, Lawrie Hooper. Ta Mnr Hooper gra, ayns tuarastyl yn Reejerey Jonathan Michael va clouit Feed Cheead as Nuy-Jeig, dy row eh gra, mannagh row y Reilys lhieeney y varney argidoil, dy jig eh dy ve ny s'lhea, lesh keeadyn dy villioonyn dy phuint, shagh cheeadyn dy housaneyn.
--ooOoo—
Ta'n Shirveishagh Tashtee, y Fer Lhee Allinson, gra dy beagh cummaltee maynrey fakin tooilley argid goll er ceau er y chirveish claynt, my vees ad shickyr dy bollagh dy beagh entreilys ry gheddyn oc da shirveishyn lane femoil. Agh dinsh eh da'n chohaglym, mannagh jinnagh y Reiltys agh ceau tooilley argid son slaynt, dy beagh eh jiolit stiagh ayns shirveishyn myr t'ad. T'eh gra dy vel obbyr trome goll er jannoo dy chur rish rollaghyn faarkee son obbraidyn reihagh, as er-lheh cataractyn as lheshyn noa. Ta'n Fer Lhee Allinson gra dy vel fys ry gheddyn echey veih cummaltee y rheynn reihyssagh echey dy vel reddyn shareaghey.
Ta'n Fer Lhee Allinson gra dy vod y Reiltys jannoo tooilley, agh dy vel feme er gobbraghey rish Kiarail Vannin er cur-lesh stiagh eh rere claare argidoil vees ry oardrail, as dy vel shen fer jeh ny cooishyn mooarey mychione y chlaare argidoil echey as shen ec y Tashtey son y vlein shoh cheet, as shen, wheesh as vees ry oardrail as y boayl dy chur yn argid shen, dy gheddyn y livrey share dy hirveishyn.
--ooOoo—
Ta'n Ard Shirveishagh, as Oltey yn Chiare as Feed son Ayrey as Maayl, Alfred Cannan, gra dy vel eh fuirraghtyn er clashtyn veih fir oayllee mychione sheshaght thieys syn Ellan. Choud's ta shoh ec cheim moghey, t'eh gra dy vel yn Rheynn Bun-Troggalys ronsaghey y chooish shoh, va jeeaghyn da'n Reiltys dy ve'n aght share as queig reihyn hain tuarastyl er er y gherrid.
Ta Mnr Cannan gra dy vel eh treishteil dy loayrt dy kiart rish ny lughtyn-reill ynnydoil mychione ny caaghyn harragh lesh cur er bun sheshaght thieys. T'eh gra dy vel mooarane feanish, rere ny va ry akin echey, foddee dy jinnagh caghlaa ayns trimmid, caghlaa ayns yn raad strateishagh, dy cummyssagh cur-lesh vondeish mooar da sleih as t'ad shirrey as ta feme orroo son thieys theayagh, as son kionneyderyn y chied cheayrt as ta feme oc er cooney, as feme er cooney son thieys coadit. T'eh gra, myr shoh, dy vel mooarane cummys ayns shen, as dy vel eh treishteil dy jean y Reiltys loayrt rish Doolish as rish lughtyn-reill elley neesht, choud's ta'n resoonaght shoh goll er oaie.
--ooOoo—
Ta'n Shirveishagh Gastid Dellal, as Oltey elley yn Chiare as Feed son Ayrey as Maayl, Tim Johnston, gra dy by vie lesh y Reiltys fakin plannyn noa goll er oaie dy aa-vioghey ynnydyn magher dhone. Ta coardail er ve currit da'n Reiltys eeck queig as feed per cent jeh costyssyn vees reihalagh son three treealtys, as fer jeu son lhiasaghey kiare feed thousane trie kerrinagh jeh reamys son traght as myn-chreck as soccar as aaght ayns Doolish.
Ta Mnr Johnstone gra dy vel towse veg dy liooar cheet veih'n Reiltys, agh dy vel shen dy liooar dy ghreinnaghey ny lhiassaghyn shoh. T'eh gra dy nee scanshoil eh neesht dy ghra dy vel cooney erbee vees goll stiagh ayns shoh, nagh jean shen taghyrt derrey vees kione currit er y chalee hene, myr shoh dy bee traaghyn geyre dy liooar currit er yn traa dy chur stiagh son plannal, as er yn traa vees feme er goaill toshiaght er troggal as er cur kione er. T'eh gra myr shoh nagh jean argid theayagh erbee goll stiagh ayn derrey t'eh jeant.
Ta Mnr Johnstone gra dy vel ad sessal neesht ny corrillaghyn son baih argid, mysh jeih per cent ayns lhiassaghey cummalagh agh wheesh as queig as feed per cent son lhiassaghyn mestit. T'eh gra dy jean ad jerkal rish cosney back yn lieh ayrn jeh shen ayns vondeish lurg da ve troggit, tra va'n shalee jeant, myr shoh dy vel yn Reiltys jerkal rish cosney back yn argid shen, myr shoh dy vel eh vondeish, vondeish da'n Reiltys, dy vel eh cur cooney, dy vel eh geddyn y bun-troggalys as fys ain dy vel feme ain er, as dy vel eh goaill toshiaght er goaill ayns laue kuse jeh ny ynnydyn shoh ta shin er jeet dy ve oayllagh rish jeeaghyn er ooilley yn traa.
Ta Mnr Johnstone gra dy row paart jeh'n oardagh jeh sessal y skeim, dy row shen jannoo shickyr dy row argid ec ny lhiasseyderyn dy yannoo yn obbyr shoh, as dy vel shen paart jeh'n oardagh dy hessal. T'eh gra dy vel shoh coardailyn rere y vun-eie jeu, as palchey fys elley dy gheddyn magh foast, as dy bee paart jeh ny conaantyn sy skeim caglieeyn traa veih'n traa as t'eh jerkit dy jean ad goaill toshiaght. T'eh gra nagh vel ad geearree y stayd myr va ry akin ayns ny laghyn t'er n'gholl shaghey, as ta lhunney mooar agh eisht nagh vel veg taghyrt rish traa foddey. T'eh gra dy vel daa skeim ass three t'ayn nish cummalagh, as dy vel feme er clane reayn dy hroggalyn, veih kionneyderyn y chied cheayrt gys dy chooilley red, ayns rieughid.
--ooOoo—
As chammah's loayrt mychione lhisassaghey ynnydyn magher dhone, ta Mnr Johnstone jeeaghyn neesht er yn choarys as feme er obbreeyn vees cheet gys yn Ellan shirrey kied obbree dy ghoaill startey. Sy chied soie Tinvaal sy vee shoh cheet ta Mnr Johnstone treishteil dy jean olteynyn coardail rish y treealtys echey dy chur ry lhiattee y coarys rish three bleeaney. Ta'n Reiltys gra dy vel coardail goll er cur da nuyad-nuy per cent dy yeearreeyn son kied obbree hannah.
Ta Mnr Johnstone gra dy vel feme er toiggal dy vel feme ain er geddyn tooilley sleih aegey ayns shoh gobbraghey syn Ellan, as dy nee margey cho cohirreydagh ee son startaghyn feiy ny cruinney ec y traa t'ayn. T'eh gra dy vel far-eie erbee ny cumrail erbee neu-ymmyrchagh ec y traa t'ayn, myr shoh dy vel y Rheynn geearree jannoo eh cho aashagh as vees possible son sleih dy reih Ellan Vannin dy heet as dy obbraghey.
--ooOoo—
Cheayll shin mychione imnea eear tarmaynagh y Reiltys, John Webster, hannah as ta imnea echey neesht mychione fysseree vees soilshaghey magh dy vel yn earroo dy leih ta gobbraghey syn Ellan er duittym liorish queig cheead, agh dy vel yn earroo dy leih ny shinney na three feed blein as queig dy eash er nirree liorish un thousane peiagh as kiare cheead. Ta Mnr Webster gra dy vel cummaltee yn Ellan surranse liorish sleih y ve cleaynit dy heet dy chummal ayns shoh, agh nagh vel feme orroo er startey.
Ta Mnr Webster gra dy vel dean policy y Reiltys dy yannoo cormid ass y noa ayns cummey y phobble, agh my vees y policy dy vel yn Ellan foshlit da peiagh erbee dy heet, dy beagh y cleayney smoo da sleih jeh'n lheid as adsyn nagh vel feme oc er startey, myr sampleyr, as er-lheh da pensioneyryn, as dy bee adsyn cleaynit ec soilsheeyn vees coyrlaghey dy vel Ellan Vannin ny voayl feer vie dy chummal ayn. T'eh gra dy vel yn sleih ta shin dy firrinagh geearree, t'adsyn sleih aegey vees gobbraghey, as dy vel y cleayney smoo er nyn son caaghyn mie son failley. T'eh gra, myr shoh, dy vel yn aght dy ghoaill toshiaght, shen dy chur faill vie dy chleayney stiagh pobble jeh'n eash dy obbraghey.
Ta Mnr Webster gra dy vel cooinaghtyn mie echey er cooish, as va colught lhiasaghey syn Ellan, as v'eh geearree cur-lesh noal eddyr three feed peiagh as jeig gys kiare feed peiagh as qualleeaghtyn oc, dy ren ad loayrt rish Della Fletcher, va feer chooneydagh, as cheusthie jeh traa giare, va ny three feed peiagh as jeig gys kiare feed peiagh currit-lesh noal. T'eh gra dy vel shen yn aght dy yannoo eh, as dy lhisagh y kerroo dellal y ve cowraghey magh da'n Reiltys dy vel sym echey er cur-lesh sleih noal, dy vel ablid echey dy chur-lesh noal ad, as dy vel eh gobbraghey lesh y Reiltys dy yannoo shen. T'eh gra nagh vel eh ry yannoo syn aght elley, liorish cur-lesh peiagh erbee gyn reih noal gys yn Ellan.
Ta dean y Reiltys dy gheddyn pobble jeh cheead thousane dy leih, agh ta doilleeidyn ayn hannah lesh, myr sampleyr, sleih fuirraghtyn rish traa liauyr dy gheddyn quaaltys marish fer lhee cadjin. Ta Mnr Webster gra, myr cummaltagh yn Ellan hannah, dy vel y feysht echey er yn Reiltys mychione ny vees goll er jannoo son ny cummaltee t'ayns shoh hannah. T'eh gra, foddee dy vel eh moylley reddyn mie Ellan Vannin da sleih as t'ad foast dy heet, agh t'eh briaght mychione ny vees goll er jannoo son yn sleih vees cummal ayns shoh hannah, er yn oyr dy vel cummaltee yn Ellan surranse, lesh kiare thousane dy leih er rollaghyn faarkee y Choonceil son thie, as y phurt aer nagh row gobbraghey dy kiart, as doilleeidyn ain lesh ny shirveishyn marrey nish.
Ta Mnr Webster gra dy vel priosyn son thieyn goll er bishaghey, er yn oyr dy vel fys ain dy vel sleih kionnaghey thieyn dy chosney argid magh assdaue, as dy vel shin kiart er vakin sleih ta nyn daaue cheet stiagh as cur cheb stiagh son yn aaght veagh ry gheddyn ayns aght elley ec sleih elley vees gobbraghey ec costys sinshley. T'eh gra dy vel kuse dy ghoilleeidyn cheet ry cheilley, vees ooilley cheet veih'n nhee dy vel dean ain dy chur-lesh cheead thousane dy leih gys shoh, agh nagh vel yn argid ny'n bun-troggalys, ny ny shirveishyn, dy ve freggyrtagh da'n earroo shen.
--ooOoo—
Va coloayrtys ayns cohaglym y Reiltys mychione caghlaa gys bree glass vees aa-noaghey, as ta'n Lught-Reill Bun-Shirveishyn Vannin gra dy vel feme er bleeantyn dy studeryssyn roish my vees gowaltyssyn geayee troggit as roie syn Ellan. Ta'n Lught-Reill er chur enn er daa ynnyd as er-lesh dy beagh ad cooie son gowaltyssyn geayee.
Ta'n Shirveishagh Bun-Troggalys, as Oltey yn Chiare as Feed son Glionfaba as Maayl, Tim Crookall, ta ny Chaairlagh neesht jeh Lught-Reill Bun-Shirveishyn Vannin, gra dy vel yn shalee dy hroggal gowaltys geayee ry yannoo, as dy vel shen y fys bee ry gheddyn veih ny sessyn er y vuilley jeh goll er oaie, vel eh ry yannoo ayns yn daa ynnyd shen. T'eh gra, mannagh vel, dy bee eh orroo scuirr er shen as feddyn ynnyd elley ny smooinaghtyn er red ennagh elley, agh dy vel y choarys t'ayn, as dy vel shen y coarys plannal t'ad goll trooid.
Marish Mnr Crookall va Lizzie Riley ta leedeil er Caghlaa Bree son y Rheynn Bun-Troggalys. Ta Bnr Riley gra dy vel shoh yn eear chied ayrn jeh'n chlaare oc, as shalee erbee t'ad dy livrey, as dy vel ad loayrt mychione y ghowaltys geayee ayns shoh, dy vel feme er bleeantyn dy studeyrys elley as coloayrtyssyn rish y theay, co-choyrle, as dy vel ad gobbraghey er shen choud's t'ad goll er oaie. T'ee gra dy vel shen doolaneagh, agh fy yerrey dy vel ad ayns shen dy livrey ny t'er ve soit er nyn son ec Reiltys Ellan Vannin, as dy vel y dean shen dy livrey gowaltys geayee er y thalloo liorish Feed Cheead as Shey as Feed, as nagh vod eh ve currit shaghey dy vel doolaneyn chagnoaylleeagh cochianglt rish shen neesht, agh dy vel ad gobbraghey cho creoi as vees ry yannoo oc dy livrey y dean shen.
Ta Bnr Riley gra dy vel fwirran dy leih oc ta cur eab er cooilleeney y job oc ec y traa t'ayn, as dy vel ad gobbraghey cho creoi as vees ry yannoo oc dy livrey ny deanyn shoh. T'ee gra dy vel ad cur eab er cur fys back gys sleih wheesh as vees ry yannoo, agh choud's t'ad jannoo shen dy bee traa dy liooar ceaut orroo, as dy vel ee shirrey er y theay dy ve surransagh, as dy jean ad wheesh as vees ry yannoo oc, agh dy bee foddey ny smoo fys ry gheddyn ayns yn daa hiaghtin shoh cheet.
--ooOoo—
Agh ta geo-fishigagh, Graham Fox-Hulme, credjal nagh jean plannyn son bree vees aa-noaghey trooid y gheay as soilshey ny greiney gientyn lectraghys dy liooar son femeyn yn Ellan, as myr shoh t'eh cheet er ny plannyn shoh myr 'marranys feer vooar'. Ec y traa t'ayn ta Bun-Shirveishyn Vannin sessal daa ynnyd dy lhiassaghey gowaltys geayee er y thalloo, as nee ad cur stiagh panelyn greiney er yn Ynnd Spoyrt Ashoonag, er Thie Lheiys Noble as er y Stashoon Marrey.
Ta Mnr Fox-Hulme credjal nagh bee shoh freggyrtagh da feme yn Ellan son bree, as t'eh credjal dy veagh bree geo-thermagh ny reih share son yn Ellan. T'eh gra dy vel ny oyryn son yn reih shen feer neu-chramp. Hoshiaght, t'eh gra nagh vel caglieeyn er, nagh vel lhiettrymyssyn er, bentyn da'n earish ny tempreilyssyn ny ny oieghyn, ny veg myr shen, agh dy vel eh ayns shen y clane traa, cho leah's t'eh er ve currit er bun.
Ta Mnr Fox-Hulme gra, lurg da ny costyssyn toshee y ve ceaut, dy vel ny costyssyn roie jeh geo-thermagh feer veg, lesh feme er veg agh cur mygeayrt yn ushtey trooid un farrane – as t'eh dy vel y chagnoaylleaght sy lhing shoh jeh'n lheid nagh vel feme agh tarrar un towl, as aa-choorsal ushtey trooid shen – myr shoh dy vel eh soit, as foddee dy jean eh tannaghtyn ayn rish, dy jarroo, keeadyn dy vleeantyn.
Ta Mnr Fox-Hulme gra, myr shoh, tra t'eh currit er bun, dy vel eh ayn dy bragh, as dy vel eh feer folliaghtagh, nagh vel agh kione farrane, as nagh vel turbeenyn geayee mooarey ooilley mygeayrt, as panelyn greiney ooilley mygeayrt, as nagh vel builley jeh er y ghooghys, son shickyrys, as s'treih eh gra dy vel shen yn aght lesh jeih thousane panel greiney, as dy vel ad mie er enn son marroo ushagyn eeanlee as ooilley jeh'n lheid shen.
Ta Mnr Fox-Hulme gra nagh vel eh toiggal yn oyr nagh vel y Reiltys ronsaghey geo-thermagh. T'eh gra dy vel y clane bai ec y traa t'ayn ayns bree er ve er gowaltyssyn geayee as panelyn greiney, as nagh vel shen agh marranys feer vooar, as nagh vel ny reddyn shoh cur y lectraghys as y shickyrs as ta feme er. T'eh gra, tra nagh vel y ghrian soilshean as nagh vel y gheay sheidey, nagh vel soilshey ny greiney ry gheddyn as nagh vel sleih geddyn lectraghys ny geay erbee, as nagh vel shen agh oyr son aggle.
Ta'n Reiltys loayrt mychione geddyn cochianglys elley rish Moggyl Ashoonagh y Reeriaght Unnaneysit, agh ta Mnr Fox-Hulme gra dy vel yn oyr smoo son reaghey dy ghientyn lectraghys ayns shoh syn Ellan, dy vel eh ry gheddyn dy slane ec sleih syn Ellan, shen dy vel eh shickyr dy trome, as t'eh gra dy vel shen yn red ard scanshoil bentyn da ny t'eh dy ghra, shen nagh vel eh baghtal as dy vel eh shickyr.
--ooOoo—
By vie lesh Kiarail Vannin shareaghey kiarail slaynt cooidjagh, as dy vel shen red ennagh as ta prowalys er ve jeant jeh as dy vel eh goll dy mie, agh foddee dy beagh eh beggan doillee cheet dy ve oayllagh rish.
Ta Ard Sheckter Kiarail Vannin, Teresa Cope, gra, ayns aght, dy vel eh lhieeney y varney eddyr goll stiagh sy thie lheiys as chied chiarail bunnidagh vees ry gheddyn, as dy jinnagh eh cur caa da sleih dy heet magh ass kiarail y thie lheiys ny s'leaie, lesh beggan elley dy chooney, as dy jinnagh eh cur ablid da sleih dy heet neese veih chied chiarail, as dy chur shaghey cheet stiagh sy thie lheiys. T'eh gra dy vel eh dy feer cooney dy chur er y hoshiaght ve neu-chrogheydagh. T'ee cheet er myr cur caa da sleih dy gheddyn beggan elley dy chooney mygeayrt y moo gyn goll stiagh sy thie lheiys, as tannaghtyn ayns ny thieyn oc hene my vees shen possible, as dy vel shen eh, currit dy neu-chramp.
Ta Bnr Cope gra dy vel shoh cummey t'er ve ayns shoh syn Ellan rish traa foddey, as nagh vel yn shirveish jeh carbid lheiys ayns rieughid er chaghlaa rish jeih bleeaney as feed, as nagh vel shoh myr dy vel ad reih red ennagh noa as anchasley, er yn oyr dy vel ymmodee coaryssyn dy chiarail as dy claynt er chur er bun shoh, as dy vel eh er ve currit er bun dy mie rish kuse dy vleeantyn, as dy vel eh feer scanshoil dy hoilshaghey magh shen da'n theay, er y fa, nagh lhisagh cur eam er nuy-nuy-nuy yn ynrican reih, er yn oyr, carbyd lheiys ve currit magh dhyt, gyn aght erbee dy hess clinicoil ve jeant roish shen, nagh vel shen yn red cadjin as nagh lhisagh eh taghyrt choud's ta shin goll er oaie.
Ta Bnr Cope gra nagh bee eh agh my vees feme feer er cheet stiagh sy thie lheiys bee sleih currit-lesh stiagh sy thie lheiys. T'ee gra, ny keayrtyn, dy vel shen dy ghra dy jean sleih tannaghtyn sy thie oc hene, ny quaaltyssyn elley ve currit da sleih, fer profeshoonagh elley cur keayrt er sleih, as dy vel eh goaill toshiaght lesh stiurey clinicoil. T'eh gra, ayns shamyr stiuree ny shirveishyn cooidjagh, tra ta sleih cur eam er nuy-nuy-nuy, dy jig toshiaght er coloayrtys clinicoil as sess clinicoil, dy hoiggal ny vees feme ec sleih er, veih slaynt as kiarail.
--ooOoo—
Ta bishaghey mooar er jeet syn earroo dy leih vees cur stiagh aggyrt son Lowanse Cummal lesh Anlheiltys. Ta fo-Rheynn Shickyrys y Theay gra dy vel couyryn elley goll er cur dy chooney dy yannoo ny sloo y preays as yn towse dy obbyr. Ta ymmodee sleih er ve gaccan dy vel cumrailyn sy chirveish. Ta'n fo-rheynn gra dy vel obbyr fo raad dy yannoo bun-earrooagh shirveishyn shickyrys y theay sy traa ry heet, er yn oyr dy vel eh jannoo seose doolane dy chummal seose eh syn aght t'eh nish.
Va vees cummaltee shirrey tooilley cooney, ta cuirrey orroo loayrt rish fwirran cooney cadjin argidoil son anlheiltys ayns Thie Markwell traa erbee sy chiaghtin, as ayns Halley Baljagh Rhumsaa Jemayrt.
--ooOoo—
