Meeryn ass Traa dy Liooar, Jelune 24oo Mee Houney 2025
Er mean, ta 1,998 surransagh recortit ec dagh fer-lhee cadjin 'syn Ellan, agh ta coyrle y Heshaght Lhee Ghoaldagh dy beagh 1,800 surransagh recortit ec cagh.
Choud's va'n Shirveishagh son Slaynt as Kiarail y Theay, Claire Christian, loayrt ayns soie Tinvaal Mee Houney yn shiaghtin shoh chaie, dooyrt ee dy vel shirveishyn ayns lheelannyn fir-lhee chadjin er lhiassaghey ayns ny bleeantyn jeieanagh dy ghoaill stiaght tooilley quaaltyssyn rish boandyryn as rish fir phrofeshoonagh elley ayns kiarail slaynt.
Ta Bnr Christian gra, tra va Kiarail Vannin currit er bun, va gaue mooar veih postyn follym son fir-lhee chadjin, lesh jeih postyn follym recortit Mee Voaldyn 2023, agh dy row shoh er n'gholl sheese gys 3.6 Mee Luanistyn 2024, as ec y traa t'ayn dy vel neu-nhee dy phostyn follym, ga dy vel arrey goll er freayll er y stayd shoh gyn scuirr, as dy vel eh taghyrt dy vel sleih çheet dy ve nyn daaue as ta sleih goll er failley.
---oooOooo---
Ta creear jeant ec Kiarail Vannin soilshaghey magh dy row surransee va goaill ayrn ayns prowalys er ymmyd jeh fer-lhee ec foddid gra dy row ad jeant saieagh dy mooar rish. Va bunney 2,500 quaaltys jeant er y çhellvane eddyr Mee Averil as Jerrey Fouyir son surransee recortit lesh y Lheelann Rhumsaa. Va colught Tekihealth pointit liorish y lheelann as Kiarail Vannin dy yannoo ny smoo yn ablid son quaaltyssyn rish fir-lhee chadjin.
Ayns freggyrt da feysht scruit veih Oltey yn Chiare as Feed son Rhumsaa, Lawrie Hooper, ta'n Shirveishagh Christian gra dy ren y prowalys croo er mean 413 quaaltyssyn elley dagh mee. Tra va cree jeant ny mast'ocsyn ren ymmyd jeh'n çhirveish, ren feed as 26 freggyrtee cowraghey magh dy row ad jeant saieagh dy mooar lioree.
Nee Kiarail Vannin jeeaghyn er yn aght ta reddyn reaghit ec y traa t'ayn, as nee ee jeeaghyn er cummaghyn elley, edyr 'syn Ellan as çheumooie jeh, roish my vees briwnys jeant er skeayley-magh shoh 'sy traa ry heet.
---oooOooo---
Ta Slaynt Theay Ellan Vannin cur raaue dy vel yn earroo dy chooishyn dy influenza 'sy Reeriaght Unnaneysit gyrjaghey ny smoghey na va sleih jerkal rish. Choud's nagh vel y bishaghey cheddin er jeet 'syn Ellan, t'eh greinnaghey y theay dy ve er nyn dwoaie.
'Syn aght cadjin, ta'n earroo dy chooishy dy influenza 'sy Reeriaght Unnaneysit goaill toshiaght er yrjaghey erskyn 10% dy hanmagh Mee Houney. Agh mleeaney, haink shen dy ve yn aght dy hanmagh Jerrey Fouyir.
Ta Slaynt y Theay gra dy vod sleih coadey adhene liorish glenney ny laueyn oc as goaill kiarail jeh'n choarys ennalagh oc, lesh thieyn geayit dy mie, as liorish sleih nagh vel gennaghtyn ro vie freayll ersooyl veih sleih t'ayns gaue. T'eh gra dy vel geddyn vaccine foast yn aght share dy ve coadit, as shen ry gheddyn ec –
- paitçhyn eddyr daa vlein as three bleeaney dy eash;
- paitçhyn jeh'n eash dy gholl gys scoill;
- mraane vees torragh;
- sleih 65 bleeaney dy eash as ny shinney;
- sleih as ta staydyn beayn jannoo er y claynt oc;
- kiaraileyderyn as sleih vees cochiangley dy çhionn rish fir er-lheh nagh vel y coarys oc hene son coadey y slaynt oc gobbraghey dy kiart; as
- obbreeyn slaynt as kiarail y theay 'sy strane toshee.
Ta Stiureyder Slaynt y Theay, yn Fer-lhee Matt Tyrer gra, choud's ta shin çheet gys y Nollick, dy vel sleih smoo lickly dy heet ry cheilley as dy hroailt gys y Reeriaght Unnaneyit lesh shilley er mooinjer. T'eh cur cooinaghtyn da sleih dy chooilleeney reddyn aashagh dy yannoo ny sloo y gaue jeh çheet dy ve çhing lesh influenxa ny lesh çhingys ennalagh elley, liorish, myr cheayll shin, glenney ny laueyn oc as goaill kiarail jeh'n choarys ennalagh oc, lesh thieyn geayit dy mie, as liorish sleih nagh vel gennaghtyn ro vie freayll ersooyl veih sleih t'ayns gaue.
Ta mysh 47% jeusyn ta reihalagh son y vaccine noi influensa er n'gheddyn eh hannah, as ta Slaynt y Theay gra dy vel shen rea dy liooar. Te'h cur coontey jeh influenza myr doghan trome foddee cur er sleih goll stiagh 'sy thie lheihys, as t'ad gra dy vel y vaccine jannoo ny sloo y gaue, as dy vel eh fondagh er-lheh son cumrail çhingys trome ec paitçhyn.
Ta Ard Sheckter Kiarail Vannin, Teresa Cope, gra dy vod doghanyn ennalagh gollrish influenza cur eiyrtyssyn co-chast tromey er sleih, as er-lheh er paitçhyn aegey, sleih shinney, mraane torragh as orroosyn lesh staydyn 'sy traa sodjey jeh'n lheid as diabetes ny doilleeidyn ennalagh, as my vees influenza skeayley-magh dy mooar, foddee dy bee tooilley sleih currit da'n thie lheihys ny eer geddyn baase. T'ee gra dy vod monnaghyn jeh çhingys ennalagh goaill stiagh ard tempreilys, cassaght, scoarnagh gonnagh, skeeys, çhingys king ny pian ayns muskylyn, as my vees fer erbee jeh ny monnaghyn shoh jannoo er sleih, dy lhisagh ad tannaghtyn sthie as shaghney buill dy chiarail slaynt. T'ee gra, my vees sleih boirit mychione ny monnaghyn oc, ny my vees ad çheet dy ve ny smessey, dy lhisagh ad shirrey coyrle lhee liorish cur eam er yn er-lhee cadjin oc ny er ny kiareyderyn çheumooie jeh ooryn cadjin.
---oooOooo---
Ayns soie Tinvaal Mee Houney, ren Oltey yn Chiare as Feed son Doolish Hiar, Joney Faragher, cur roish treealtys dy jinnagh yn Tashtey freayll rish ymmyd jeh'n choarys Y Kaart Aym rish shey meeaghyn elley lurg jerrey Mee ny Nollick 2025, derrey vees saase elley ayn, lesh ny shlee na 700 dy leih ta geddyn cooney cadjin argidoil as pensionyn trooid Y Kaart Aym as nagh vel coontyssyn banc oc, as myr shoh veagh ad er ve faagit gyn aght dy gheddyn yn argid shen er chor erbee.
Ta olteynyn Tinvaal er chremmey y reiltys roish nish, lurg fogrey dy beagh y coarys Y Kaart Aym scryssit magh lurg jerrey ny bleeaney 2025, gra dy row ymmodee sleih as nagh row coontyssyn banc oc, myr shoh nagh dod y Tashtey reaghey dy eeck yn argid shen daue. Ayns freggyrtyn roish nish, ta'n Fer-lhee Allinson er n'hgra dy vel y reiltys fo raad shirrey saaseyn elley, agh Jerrey Fouyir tra dooyrt eh shen, dooyrt olteynyn dy row shen yn un freggyrt va currit echey lieh-vlein er dy henney, gyn enn erbee ve currit er reih elley, as lesh jerrey y choarys reaghit ec y traa shen agh ayns daa vee.
Ta'n Fer-lhee Alex Allinson, gra dy vel y reiltys freggyrtagh da eamyn Tinvaal dy reayll rish jannoo ymmyd jeh'n choarys Y Kaart Aym son sleih dy gheddyn cooney cadjin argidoil as pensionyn harrish boayrd yn Oik Postagh choud's t'eh ronsaghey reihyn elley ec y traa cheddin.
'Sy resooney magh er treealtys Bnr Faragher, dooyrt yn Shirveishagh Tashtee, yn Fer-lhee Alex Allinson, dy beagh tooilley myn-phoyntyn currit roish Tinvaal Mee ny Nollick, agh eisht ren yn Ard Shirveishagh, Alfred Cannan, shirrey kied dy chur shaghey y resooney magh derrey yn laa er-giyn dy chur da Coonceil ny Shirveishee caa dy reaghey plannyn. Ny s'moghey 'sy çhiaghtin shoh chaie, dooyrt yn Fer-lhee Allinson dy jinnagh eh costal £60,000 dy reayll rish jannoo ymmyd jeh'n choarys as nagh beagh shen cho aashagh as foddee dy row eh jeeaghyn.
Lurg coloayrtyssyn eginagh mastey Coonceil ny Gaelgey myr freggyrt da olteynyn cremmey dy geyre yn aght va'n reiltys goll lesh y chooish shoh, lesh kiarail dy chur kione er y choarys. Myr eiyrtys jeh ny coloayrtyssyn eginagh shen ren Mnr Cannan cur roish lhiasaghey da treealtys Bnr Faragher, dy beagh adsyn nagh vod fosley coontys banc cadjin bunnidagh geddyn kaart noa veih'n 1 Jerrey Geuree maghey. Ren Oltey y Choonceil Slattyssagh, Rob Mercer, roish lhiasaghey elley dy ghoaill stiagh adsyn nagh vod jannoo ymmyd jeh coontys banc. Ta lhiasaghey Mnr Cannan cur yn reiltys neesht dy gheddyn saaseyn 'sy traa sodjey dy eeck cooney cadjin argidoil as pensionyn daueyn gyn entreilys da coontyssyn banc çheusthie jeh shey meeaghyn.
Ayns cur roish y treealtys echey, as Mnr Mercer niartaghey eh, ta Mnr Cannan gra, tra son shickyrys nagh vel ymmyder Y Kaart Aym abyl dy gholl harrish, cre erbee vees yn oyr, gys coontys banc cadjin ny dy chur er bun coontys banc, eisht bee Y Kaart Aym noa currit da dy obbraghey veih'n 1 Jerrey Geuree 2026. T'eh gra dy nee baghtal eh dy vel feme er yn Tashtey freayll rish obbraghey dy yannoo shickyr dy vel ocsyn as ta feme oc er argid roie, cre erbee vees yn oyr, yn ablid shen dy gheddyn entreilys da shen.
Va shen ayns soie Tinvaal, as ny s'anmee ren Radio Vannin briaght jeh'n Er-lhee Allinson mychione yn oyr nagh row plan noa currit roish agh bunnys ec y traa s'jerree. T'eh gra dy row earroo dy aghtyn-feayslee ayn as va goll trooid barganeaghyn traghtee lesh caghlaaghyn sheshaghtyn, goaill stiagh Oik Postagh Ellan Vannin, as dy row eh lane vaghtal y laa roish shen lesh y niart dy ennaghtyn ayns Tinvaal as ny aggyrtyn v'ayn, myr shoh dy ren ad loayrt reesht rish Oik Postagh Ellan Vannin dy yannoo shickyr dy bollagh dy vod shen ve livreit ayns traa as dy ren eh feeraghey shen.
Ta Oltey yn Chiare as Feed son Doolish Hiar, Joney Faragher, er ghreinnaghey cooyl-vinkeyderyn dy scuirr veih pohlldal lhiasaghyn y reilts, as ish cur coontey jeu dy vel ad jannoo ny s'faase treealtyssyn as y chiarail oc dy chur brod son cooilleeney red ennagh. T'ee gra dy lhisagh Coonceil ny Shirveishee cur enn er y phooar oddys ve ec cooyl-vinkeyderyn my vees ad votal cooidjagh. T'ee gra dy nee niart ard-kionyssagh ta Coonceil ny Shirveishee, dy nee niart feer lajer eh 'sy whaiyl shen, as dy vod sleih ayns rieughid fakin y scughey 'sy vree tra ta Coonceil ny Shirveishee toiggal dy doaltattym nagh bee y lhiasaghey echey er ny phohlldal.
Ta Oltey yn Chiare as Feed son Carbory, Balleychashtal as Malew, Jason Moorhouse, gra dy vel yn imnea mooar echey, choud's dy vel aght-feayslee ain 'sy traa giare, agh dy jean y nah chooish vooar çheet dy ve ayn lurg y nah reihys mooar cadjin, myr shoh dy vel shoh er ve cooish raad t'ad cur shaghey y freggyrtys as jeeaghyn er ny ta'n nah phossan dy leih dy yannoo, as er-lesh nagh vel shen aght-feayslee kiart t'ayn da doilleeid t'er ve goll er choud.
Ta'n Tashtey nish cur eab er loayrt rish mysh 600 ymmyder Y Kaart Aym nagh vel er chur eam er yn rheynn choud's nish. Ec jerrey ny bleeaney shoh, nee ny kaartyn, t'er ve ayns ymmyd neayr's 2009, rere yn aght t'ad kiaddit, scuirr veih gobbraghey. Bee feme er cur magh kaartyn noa son yn 1 Jerrey Geuree maghey.
Jecrean yn 26 Mee Houney, va seshoon keayrtagh ayn lesh fir oik ass kiare bancyn yn Ellan kionefenish ayns Thie Markwell ayns Doolish dy chooney lesh sleih nagh row abyl dy osley coontys banc choud's nish.
Ta'n Fer-lhee Allinson gra, ny t'er ve jeant oc, shen dy chur harrish y chooid smoo dy leih hannah gys ny coontyssyn banc oc t'ayn nish. T'eh gra dy vel fys oc, myr sampleyr, dy vel ny shlee na cheead dy leih jannoo ymmyd jeh'n Chaart Aym, agh dy vel ad geddyn cooney cadjin argidoil elley eeckit dy jeeragh stiagh ayns y choontys banc oc. T'eh gra dy vel ad ooilley goll er insh ayns screeuyn dy bee ooilley yn chooney cadjin argidoil oc goll dy jeeragh stiagh ayns ny coontyssyn banc oc,
Ta'n Fer-lhee Allinson gra, er-son yn sleih vees faagit, ny t'ad er reaghey Jecrean yn çhiaghtin shoh, shen seshoon keayrtagh eddyr 9:30 as 12:30 ayns Thie Markwell, as geddyn ooilley ny kiare bancyn y straid vooar cochianglt rish dy chooney lesh sleih as va doilleeid oc cur er bun coontyssyn banc dy gheddyn coontys banc bunnidagh nee cur ablid daue dy gheddyn argid currit harrish gys y choontys oc, agh dy chur ablid daue neesht dy yannoo eeckyssyn liorish kaart as reddyn gollrish shen dy vel ymmodee jin goaill myr red cadjin.
Ta'n Fer-lhee Allinson gra dy vel ad cur eab er obbraghey neesht rish yn sleih shen, cre erbee vees yn oyr, nagh vod geddyn coontys banc, ny nagh vel ablid oc jannoo ymmyd jeh coontys banc, dy chur Y Kaart Aym noa veih'n 1 Jerrey Geuree myr shirveish heyrsnys eeckys, dy bee ablid oc jannoo ymmyd jeh 'syn Oik Postagh. T'eh gra nagh vod ad goaill stiagh dy chooilley pheiagh, er yn oyr, dy nee baghtal eh, dy vel sleih geddyn cooney cadjin argidoil goll eddyr lughtyn-thie aegey geddyn cooney cadjin argidoil son paitçhyn gys sleih shinney geddyn pensionyn, as dy vel feme oc jannoo shickyr dy vod ad obbraghey rish dagh brastyl er-lheh as rish ooilley jeu, dy yannoo shickyr dy vel ad geddyn y cooney cadjin argidoil er-hon t'ad reihalagh.
Ta'n Fer-lhee Allinson gra dy vel slane reayn dy skeimyn fo raad oc gobbraghey rish sheshaghtyn traghtee dy lowal sleih dy gheddyn cooney cadjin argidoil eer mannagh vod ad geddyn coontys banc. T'eh gra, myr sampleyr, er-son y sleih nagh vel cur eam orroo, as tra ta'n Kaart Aym scuirr veih obbraghey as nagh vel ad er chur stiagh son Y Chaart Aym noa, dy jean ad cur daue sheckyn, foddee ve eeckit stiagh ayns banc, my vees coontys banc oc, ny currit-lhieu stiagh ayns yn Oik Postagh dy ve maylartit son argid roie ayns shen. T'eh gra dy vel aghtyn oc dy yannoo shen, as dy vel ad jeeaghyn neesht er aghtyn elley dy chur-rish sleih vees strepey rish geddyn coontyssyn banc, as vees strepey lesh eeckyssyn automatagh, dy yannoo shickyr dy vel dy chooilley pheiagh 'syn Ellan ain currit-lesh er oai lesh y chur harrish shoh ersooyl veih shen choarys yn eiraght.
---oooOooo---
Ren Olteynyn Tinvaal coardail rish reayn dy aghtyn as y dean jeu dy yannoo noa-emshiragh as jannoo ny sassey y coarys plannal. Ta'n reiltys gra dy vel Reillyn er Troggalyn Recortit 2025 jannoo seose ayns y Chlaare son Aa-chummey y Çhymmyltaght Troggit. Ta'n reiltys gra dy jean ny caghlaaghyn ny s'tappee as ny sassey yn aght ta troggalyn currit 'sy recortys, lesh oardagh smoo fondagh as cooie as aashagh son shellooderyn thie as son lhiaseyderyn.
Ta ny reillyn noa geddyn rey rish feme er yeearreeyn er-lheh son recortey troggalyn as son yeearreeyn plannal ayns ardyn freillt, as ta'n reiltys jerkal rish shoh cur shaghey obbyr dooblit as jannoo baghtal ny vees feme er yeearreyderyn jannoo. T'eh gra dy bee caglieeyn s'baghtaley er ny sorçhyn dy obbyr vees feme kied phlannal, gyn feme ec shellooderyn thie son y chooid smoo 'sy traa ry heet er kied phlannal son reddyn gollrish peintal, geddyn rey rish bwaagyn beggey ny bwaaneyn mooie cochianglt rish y thie, as cur sheese eaghtyryn creoi noa gollrish cassan immanagh. Ta fir oik gra dy jean ny aa-chummaghyn jannoo ny sloo yn obbyr oik as jannoo ny s'girrey y traa son reddyn dy ve jeant, as dy jean shen cooney dy chur y coarys goll smoo rea.
Ta'n Shirveishagh son Çhymmyltaght, Bee as Eirinys, as Oltey yn Chiare as Feed son Doolish Hiar, Clare Barber, çheet er ny caghlaaghyn myr jannoo seose keim mooar 'sy chlaare dy aa-chummey yn oardagh plannal, as dy jean y creatlagh noa cur er y choarys ve ny s'baghtaley, ny s'cooie, ny share ayns cummal seose lhiasaghey cooie noa as coadey yn eiraght troggit ain. T'eh jerkit dy bee bree currit da'n fo-clattys noa dy moghey 2026.
As ta cummaltee goll er greinnaghey dy chur stiagh yeearree dy heet dy ve oltey theayagh Bing Phlannal Ellan Vannin. Shoh er yn oyr dy vel oltey t'ayn nish, Peter Young, çheet dy ve ny haaue lurg 15 bleeaney myr oltey.
Ta'n ving phlannal gra nagh vel feme er qualleeaghtyn formoil ec shirreyderyn, agh lhisagh fys mie ve oc er yn Ellan, goaill stiagh fys er shennaghys, er çheer-oaylleeagh as er cooishyn sheshoil yn Ellan, chammah's sym feer er shirveishagh er y theay. T'eh gra neesht dy vel schleiyn eddyr-phersoonagh as eddyr-insh lane femoil, lesh ablid dy hur-smooinaghtyn er caghlaaghyn barel as dy ve çhaghter ass-lieh sym s'lhea y theay.
Ta Oltey yn Chiare as Feed son Connaghyn, Rob Callister, gra dy persoonagh dy vel eshyn er ve ny chaairlagh jeh'n ving phlannal neayr's Mee Houney 2023, as dy vel eh eh n'ghoaill taitnys dy feer veih ve caairlagh y ving shen, vees jannoo briwnys er mysh 20% jeh ooilley ny yeeaarreeyn plannal vees currit stiagh ayn, as dy vel 80% currit-rish liorish fir oik. T'eh gra dy nee caa er-lheh eh son peiagh erbee vees geearree çheet er y hoshiaght as cur eab er y phaart shen, er yn oyr dy vel ablid firrinagh oc dy chur stiagh 'syn aght nee'n Ellan shoh jeeaghyn as gennaghtyn da ymmodee sheelogheyn ry heet.
Ta Mnr Callister gra dy vel eshyn er n'ghoaill taitnys dy feer jeh shen gyn rour ve currit stiagh er ayns aght politickagh, as myr shoh my by vie lesh peiagh ennagh goaill kesmad er y hoshiaght as ayns rieughid gennaghtyn dy vel ny schleiyn kiart oc son shoh, eisht dy jean ny yeearreeyn dooney Jecrean y 17 Mee ny Nollick 2025.
Ta Mnr Callister gra dy vel ynnyd 'sy ving phlannal son oltey theayagh, as dy vel ad goll stiagh ayns dagh çhaglym dagh nah hiaghtin, as dy vel ad goll stiagh ayns ny çhaglymyn shen myr olteynyn neu-chrogheydagh, nagh vel ad loayrt mychione ny yeearreeyn rolaue, as dy vel ad jannoo reaghys er ny briwnyssyn dy yannoo, agh dy vel eh soit er mynjeig ta olteynyn geddyn veih fir oik, as dy vel ny reaghyssyn shen jeant çheusthie jeh'n chreatlagh leigh as polasee y Clattys Gurneil Troggal 1999 as Plan Strateishagh Ellan Vannin, as ny plannyn cooie son ny ardyn, t'er ve cooish son coloayrtys ayns ny shiaghtinyn jeieanagh.
Ta Mnr Callister gra dy nee'n chooish ard scanshoil ee dy vel fir oik phrofeshoonagh ayns shen dy stiurey ad, dy vel adsyn cur roish moyllaghyn, as dy vel adsyn eisht jannoo briwnys lhisagh ny moyllaghyn shen goll er pohlldal ny dy vel ad cur roish reihyn elley. T'eh gra dy vel y red smoo scanshoil mychione y phaart shoh, shen yn nhee dy vel eh dy firrinagh neu-chrogheydagh as dy vel caa dy chur stiagh ayn dy mooar bentyn da'n aght nee'n Ellan shoh jeeaghyn as gennaghtyn rish ymmodee bleeantyn ry heet.
Foddee yeearreeyn ve currit stiagh ayn nish as ta'n oardagh shen tannaghtyn foshlit derrey meanoie, Jecrean yn 17 Mee ny Nollick.
Bentyn da çheet dy ve ny haaue, ta Peter Young gra dy vel eh er goaill taitnys dy bollagh jeh'n traa echey myr oltey y ving. T'eh gra dy vel y paart cur caa da cur-stiagh ayns briwnyssyn vees cooney dy chummey co-voodeeyssyn yn Ellan, as caa dy ve coraa ass-lieh theay Ellan Vannin. T'eh what ny t'ad coardail, dy bee shen ayn son y cloan ain, as eer son nyn oeghyn ayns ny 50 bleeaney-60 blein shoh çheet, myr shoh dy nee ynnyd scanshoil eh.
Ta'n Ving Phlannal cummal çhaglym dagh kegeesh ny dagh three shiaghteeyn dy hur-smooinaghtyn er mysh jeih yeearreeyn ayns dagh çhaglym.
Ta'n reiltys gra, dy chooney lesh obbyr fondagh y Ving Phlannal, dy vel Coonceil ny Shirveishee er choardail rish failley olteynyn noa ayns keimyn. Rere shen, bee un oltey theayagh pointit çhelleeragh, as t'eh jerkit dy bee sleih elley pointit lieh-raad trooid 2026.
---oooOooo---
Ta creear mastey ny shlee na 90 colught er n'gheddyn magh dy vel ny smoo na'n lieh-ayrn jeu credjal dy bee feme oc jannoo giarraghyn ny geddyn rey rish olteynyn y wirran oc 'sy vlein shoh çheet. Va ny data currit cooidjagh liorish Forum y Tarmaynys Ynnydoil lurg çhaglym theayagh dy loayrt mychione yn eiyrtys jeh'n vishaghey 'syn Aill Sloo veih'n 1 Mee Averil maghey. Ta ny colughtyn failley 3,800 dy leih, as 'sy chreear va currit orroo dy ooley y builley jeh'n vishaghey da'n Aill Sloo orroo er yn ablid oc dy hannaghtyn foshlit, er ny ooryn nee ad obbraghey, er yn earroo dy leih gobbraghey daue as er traenal.
Choud's dooyrt shiartanse dy cholughtyn dy vel doilleeidyn jannoo orroo hannah, hooar y Forum magh dy vel colughtyn credjal dy bee shen foddey ny smoo lickly er-coontey y rate noa 'syn Aill Sloo. Choud's va un cholught gra dy row gaue mooar echey jeh failleil 2025, ren 14 freggyrtee gra dy beagh ad ayns gaue lesh yn aill noa 'sy chooish.
Ta 57% jeh freggyrtee gra dy beagh gaue mooar ny trome jeh giarraghyn ny sleih currit ass startaghyn tra hig stiagh y rate noa, cosoyley rish 15% ec y traa t'ayn, choud's ren 70% gra dy beagh giarraghyn jeant oc ayns baih argid as ayns failley sleih aegey.
Ta screeudeyr yn Orum, Brett Martin, gra dy vel yn eiyrtys ry akin dy baghtal ayns freggyrtyn da'n chreear, as er-leh lesh bishaghey rish three keayrtyn shen jeh bolgey argidoil 'syn Aill Sloo, nee goll seose veih £12.25 'syn oor gys £13.46 'syn oor veih Mee Averil, myr va coardit ec Olteynyn Tinvaal Jerrey Fouyir.
Ta aghtyn dy aa-chummey y coarys bentyn da kied obbree er-son sleih ta çheet gys yn Ellan er ve currit shaghey. Ny s'moghey 'sy vlein shoh va'n reiltys plannal dy gheddyn rey rish y choarys dy bollagh, agh lurg clashtyn barelyn ny cooyl-vinkeyderyn, dooyrt yn Shirveishagh son Gastid Dellal, as Oltey yn Chiare as Feed son Ayrey as Maayl, Tim Johnston, dy row eh cur enn er y scansh jeh.
Va aa-scrutaght jeh'n choarys bentyn da kied obbree reaghit dy ve jeant Mean Fouyir, agh ta shen er ve currit shaghey derrey Mean Souree 'sy vlein shoh çheet.
---oooOooo---
Ta'n Shirveishagh son Ynsagh, Spoyrt as Cultoor, Daphne Caine, gra dy vel obbyr er n'gholl er y hoshiaght dy mooar ayns kiaddey Scoill Ard noa Cashtal Rushen. T'ee gra dy vel yn shalee nish ec Keim Jees y Heshaght Reeoil dy Heyrnee Ghoaldagh, as shen dy ghra y keim son kiaddey ny bun-eieyn, vees reaghey yn aght yinnagh y troggal jeeaghyn as obbraghey.
Ren Oltey yn Chiare as Feed son Rhumsaa, Lawrie Hooper, cremmey mellid y halee, as hug eh coontey jeh myr ve foast ec keim moghey, as cur raaue, dy beagh cumrail er treealtyssyn bentyn da'n chostys çheu-hoal jeh Mean Souree 2026, nagh beagh ablid ec y lught-reill t'ayn nish dy scrutaghey ad. Roish nish ren yn Shirveishagh son Bun-troggalys, as Oltey yn Chiare as Feed son Rushen, yn Dr Michelle Haywood, er n'ghra dy row ee treishteil dy beagh kiebbaghyn 'sy thalloo liorish yn tourey 'sy vlein shoh çheet.
Ta Bnr Caine gra dy vel ooilley ny obbraghyn bun-argidoil oc ayns Plan y Rheynn jannoo seose tosheeaght, as dy vel ad gobbraghey as dy vel ad gobbraghey nyn drooid cho kiarailagh as oddys ad.
Ta Bnr Caine gra dy vel ymmodee preayssyn er y rheynn eck, agh t'ee er veeraghey dy vel loghan snaue son y cho-voodeeys foast jannoo seose ayrn jeh ny plannyn t'ayn son Scoill Ard Cashtal Rushen noa.
Nurree ren yn reiltys baggyrt dy ghooney Loghan Snaue y Jiass son oyryn argidoil. Lurg da plan noa ve coardit rish ny lughtyn-reill ynnydoil, v'eh reaghit dy beagh argid goll er cur er-e-son derrey veagh seyraad noa troggit.
Ga nagh row loghan snaue imraait dy baghal ayns kuse dy phlannyn choud's nish, ta Bnr Caine shassoo er dy vel eh jannoo seose dy mooar ayrn jeh'n chiaddey. T'ee gra dy vel ee son shickyrys 'sy phlan reamyssagh, as dy vel eh reaghey magh ny buill yinnagh ooilley ny ayrnyn jeh'n phlan goll, as dy vel eh rish y wirran coyrlee ta tarroogh tayrn magh y chiaddey jerrinagh son y clane ynnyd.
---oooOooo---
Ta'n earroo dy studeyryn ayns ny bunscoillyn ta reih dy ghoaill lhongey 'sy scoill er duittym liorish mysh 20% 'sy vlein t'er n'gholl shaghey. Ren Oltey yn Chiare as Feed son Connaghyn, Julie Edge, cur feysht scruit er y chooish er yn Shirveishagh Caine, as ta'n freggyrt eck soilshaghey magh dy vel tooilley studeyryn er n'ghoaill toshiaght er cur-lhieu kirbyl paggit.
Mean Fouyir ec toshiaght y vlein noa academoil, ren yn Rheynn Ynsee, Spoyrt as Cultoor fograghey magh caghlaa ayns kaartyn bee ny scoillyn, geddyn rey rish y towse dy vee ultra-obbrit as cur messyn as bainney ayns ynnyd jeh puddinyn.
Agh ta Bnr Caine gra dy vod ny earrooyn bentyn da reih dy ghoaill lhongaghyn ayns ny scoillyn goll seose-neose 'syn aght shoh car ny bleeaney son caghlaaghyn oyr, goaill stiagh caghlaaghyn 'syn emshyr vees jannoo ny smoo ny jannoo ny sloo yn aggyrt son dagh sorçh dy lhongey.
Ren Bnr Edge shirrey ny earrooyn veih Jerrey Geuree, Mean Fouyr as Jerrey Fouyir 2025:
- Jerrey Geuree va lhongey scoill ec 3,255 paitçhey, choud's ren 1,624 dy paitçhyn cur-lhieu kirbyl paggit; as shen dy ghra dy row mysh daa hreen jeu gee bee jeant aarloo 'sy scoill;
- Mean Fouyir, va lhongey scoill ec 2,798 dy phaitçhyn, va 57.4% jeh'n earroo Jerrey Geuree, lesh 2,073 dy phaitçhyn cur-lhieu kirbyl paggit; as
- Jerrey Fouyir, ren ny data soilshaghey magh dy row ny sloo na'n lieh-ayrn dy phaitçhyn goaill lhongey scoill, lesh 2,534 dy phaitçhyn jannoo shen, cosoyley rish 2,562 dy paitçhyn va cur lhieu kirbyl paggit.
Ren dy chooilley bunscoill agh nane soilshaghey magh dy row y corrillagh per cent dy phaitçhyn va goaill lhongey scoill goll sheese eddyr Jerrey Geuree as Jerrey Fouyir, lesh Bunscoill Noo Thomaase yn ynrican scoill raad va bishaghey beg 'syn earroo veih 45% jeh ny paitçhyn gys 50% jeu.
Ren ny fyserree Jerrey Fouyir soilshaghey magh dy row y corrillagh per cent sinshley dy phaitçhyn goaill lhongey scoill ayns Laksey, lesh 34%, va beggan fo Balley Cottier lesh 35% as Andreays lesh 36%. Ren ny fysseree soilshaghey magh y corrillagh per cent syrjey Jerrey Fouyir ayns Sulby, lesh 69%, jus erskyn Jourby lesh 68% as Noo Moirrey lesh 63%
Cha nel paitçhyn 'sy vrastyl oltaghey goaill kirbyl 'sy scoill 'sy chied shiaghtin jeh'n vlein academoil Mean Fouyir, as ec jerrey yn imbagh ta immeeaghtyn cochianglt rish yn imbagh, jeh'n lheid as jinnair y Nollick.
Ta Bnr Caine gra dy vel eh oyr son ve mollit dy vel gyn ourys er jeet beoyn gys kirbylyn paggit son kuse dy phaitçhyn shiartanse dy laghyn, agh dy vel eh feer doillee dy yannoo jalloo keayrt er-lheh jeh laghyn er-lheh, as dy hoiggal ny vees son shickyrys jannoo y reaghys shen, er yn oyr dy vel ec kuse dy scoillyn shiartanse dy phaitçhyn ta çheet stiagh ayn ny ta freayll çheumooie, croghey er kaart bee y laa shen as mie lhieu y lhongey shen vees goll er çhebbal, agh dy nee baghtal eh, veih çheu y rheynn, dy vel eh lhongey feer slayntoil, veaghee t'eh dy hebbal.
Ta Bnr Caine gra dy vel ad geaishtagh rish barelyn back veih studeyryn, rish barelyn back veih paarantyn, as dy scanshoil, rish barelyn back veih ny shamyryn aarlee, veih fir ynsee, bentyn da'n aght foddee ad jannoo caghlaaghyn beggey da ny vees goll er çhebbal 'sy chaart bee, dy vel eh cleayney yn earroo s'lhea dy phaitçhyn, dy vod ad freayll rish livrey lhongaghyn vees lane clayntoil, veaghee, as, dy scanshoil, jannoo ny sloo yn ayndagh shen ultra-obbrit. T'ee goaill ree dy nee doillee ta caghlaa, agh dy vel eh çheet veih çheu mie dy bollagh dy vieys feer vie dy jarroo, as t'ee credjal dy vel ad nish roshtyn ayndagh jeh mysh 25% jeh troaryn Vannin.
Ta Bnr Caine gra dy nee symoil eh ayns scoill ny ghaa, dy vel scoillyn elley er nakin bishaghey beg ayns goaill lhongaghyn scoill, ny dy vel eh er tannaghtyn mysh y red cheddin. Er-lhee dy vel shen ayns paart preays ny mast'oc, dy vel mooarane jeh un phaitçhey geearree goll gys kirbyl paggit my vees y carrey echey goll gys kirbyl paggit. T'ee sheiltyn dy vel yn ynnyd t'adsyn ayn, dy vel ad geearree jannoo lhongey slayntoil, y reih slayntoil, ny reih aashagh, dy chleayney tooilley studeyryn, as dy vel ee smooinaghtyn, er-lheh tra ta shin çheet stiagh ayns Jerrey Geuree as yn earish feayr, as foddee dy vel y noaid jeh poagey noa son kirbyl paggit er jeet dy ve ceaut beggan, foddee dy bee y lhongey çheh cleayney ny smoo.
Ta Bnr Caine gra dy vel ad geaishtagh dy jarroo neesht rish ny barelyn back bentyn da ny reihyn, myr shoh dy vel ad caghlaa beggan ny vees ry gheddyn 'sy skelloo ghlassan, as dy cummyssagh y reih dy vessyn vees gyn cagliagh, as chammah's shen, bentyn da ny reihyn raad ta'n çheb gyn feill, as y çheb son losseyderyn, as cre ny lhongaghyn vees goll ny share liorish y cheilley dy vel reih feer ayns son paitçhyn. Cha nod ee agh gra dy vel y fwirran son lhongaghyn ny bunscoillyn er ve gobbraghey creoi erskyn credjue, as dy vel ee kiarit dy mooar as dy jarroo er jannoo ny vees goll er çhebbal ayns nyn lhongaghyn yn red smoo cleaynagh, yn reih aashagh.
Ta Bnr Caine gra dy cummyssagh dy vel eh foast ny laghyn smoghey, as dy jean ad tannaghtyn lesh freayll arrey as dy jean ad tannaghtyn lesh cur freggyrt da barelyn çheet back, as dy jean ad tannaghtyn lesh livrey lhongaghyn jeh ard vieys er bastal, jeh stoo ultra-obbrit injil, yindyssagh, beaghee, lesh troaryn Vannin wheesh as vees possible.
Ta Bnr Caine gra dy vel ad jeeaghyn, myr sampleyr, er ketçhup, yinnagh shen cur studeyr ny ghaa elley harrish gys reih y lhongey, as dy nee baghtal eh dy beagh feme oc feddyn boayl dy gheddyn reih dy hugyr injil, dy hollan injil er shen. T'ee gra dy vel ad er n'yannoo possible eh son mayonnaise dy ve currit lesh fillag tuna ny rish lhongaghyn as tuna ayn son y laa, as dy vel ad jeeaghyn er feer vooar er taitnys yn imbagh ve oc, myr shoh dy baghtal eh dy bee scoillyn jannoo aarloo son kaartyn bee yn eailley oc, as dy cummyssagh dy bee jeant ayns ny shamyryn aarlee oc hene taitnys arran Albinagh yn eailley, as dy jean ad jeeaghyn er jannoo red ennagh gollrish shen bentyn da taitnyssyn elley yn imbagh ayns imbaghyn elley.
Ta Bnr Caine gra dy vel eh bentyn rish cur oashyn miey, bee feer slayntoil, as goaill tastey jeh ny vees bee feer slayntoil, as dy vod ish gra, lurg jee goll gys kuse jeh ny scoillyn shoh, as ec fer jeu dy firrinagh, y laa er-lheh shen Jerrey Fouyir, soilshaghey magh injillaghey 'syn earroo goaill lhongey scoill, nagh row shen ny va goll er inshit jee liorish shamyr aarlee y scoill, dy row ad ooilley jeant feer jeean, as dy row ny studeyryn lioroo ren ee soie sheese choud's v'ee goaill y phye stheag vraew yindyssagh, dy row ad ooilley jeant feer jeean 'syn aght cheddin, ga dy row earroo smoo dy leih y laa shen reih y pizza, nagh vel ultra-obbrit, agh dy by chosoylagh eh dy vel eh obbrit, agh dy nee baghtal eh dy vel yn reih eddyr pizza Margharita ny pye stheag yindyssagh fuinnit sthie fer doillee son paitçhyn.
Ta Bnr Caine gra, ooilley ny barelyn back t'ad dy gheddyn, dy vel ee cur barrant ayn dy vel ny vees currit magh oc nish dy kinjagh jeh ard-vieys, bee feer vie dy jarroo, as, myr dooyrt ee, dy vel ad geearree jannoo y reih slayntoil shen y reih aashagh, as dy chur ablid da tooilley paitçhyn dy gheddyn entreilys da lhongaghyn scoill feer vie, veaghee.
Tra va'n kaart bee noa currit er bun, va imneaghyn currit roish ec paarantyn as paitçhyn oc surranse liorish diabetes, er yn oyr dy row gennid dy yss mychione towseyn beaghee jeh ny lhongaghyn as reddyn elley ta ry gheddyn. Ta Bnr Caine gra dy vel y rheynn er ve gobbraghey rish paarantyn as rish yn çheshaght, Diabetes Ellan Vannin, dy ghoaill ayns laue y chooish shoh. T'ee gra dy vel kiarail er-lheh currit da paitçhyn as diabetes jannoo orroo çheusthie jeh ny scoillyn ta reih dy ghoaill lhongaghyn scoill, as son paart jeu, dy vel lhongaghyn er-lheh, ny lhie er y reih, dy vel paitçhyn as diabetes jannoo orroo geddyn y lhongey shen jeant aarloo er-lheh, jeant aarloo as coagyrit, dy vel fys ain dy jeeragh er yn ayndagh jeh carbohydrateyn t'ayns y veer er-lheh shen.
Yiarragh Bnr Caine, harrish y clane cooish, dy vel ad er n'ynsaghey veih, dy vel fys oc cre cho scanshoil as t'eh dy gheddyn ny towseyn, y soilsheydys, fys veih ny paarantyn mychione y chaart bee, magh ayns aght traaoil, as 'naght cheddin dy vel ad freayll rish obbraghey rish cur stiagh veih Diabetes Ellan Vannin, chammah's veih ny bee-oaylleeyn, veih'n Rheynn Çhymmyltaght, Bee as Eirinys as Slaynt y Theay, as dy vel dy chooilley pheiagh ayns shen reaghey ny reihyn noa 'sy chaart bee son y traa ry heet, as dy vod ee smooinaghtyn, lesh ooilley y chur stiagh shen dy jean reddyn freayll rish goll er livrey gys ard-vieys dy jarroo.
Va aa-scrutaght jeant er y gherrid as t'eh soilshaghey magh dy vel bee vees feeu bunnys £150,000 goll er jummal dagh blein. Rein studeyrys rish three shiaghteeyn ayns three bunscoillyn soilshaghey magh dy vel mysh 40kg dy vee faagit er claareyn dagh shiaghtin, lesh 31 chg elley ceaut ersooyl 'sy çhamyr aarlee. Ta'n Rheynn Ynsee, Spoyrt as Cultoor gooley dy vel shoh costal £145,763.70 dagh blein ayns ooilley ny scoillyn – vees beggan ny sloo na 5% jeh'n chlaare argidoil son lhongaghyn scoill.
---oooOooo---
Ta co-choyrle theayagh er ve lhunnit er caghlaaghyn treealit da Slattys Cooney ec y Leigh 1986, as yn dean jeu dy chur bree da moyllaghyn veih'n Aa-scrutaght er Cooney ec y Leigh 2021. Ta'n Tashtey as yn Ving er Cooney ec y Leigh gra dy jinnagh dy caghlaaghyn dy yannoo y clattys rere yn date cooney dy hareaghey shirveishyn son cooney ec y leigh, as va possan stiuree currit er dy scrutaghey ny treealtyssyn as dy obbraghey lesh sleih cooie vees cochianglt rish y chooish.
Ta'n Shirveishagh Tashtee, yn Fer-lhee Alex Allinson, greinnaghey y theay dy rheynn ny barelyn oc choud's ta'n co-choyrle goll er cummal. Ta'n docamaid ry gheddyn ec rhollan co-choyrle y reiltys as foddee sleih cur stiagh nyn marel er-linney, liorish post-l ny trooid y phost derrey y 22 Mee ny Nollick.
Ta eear fer oik da'n reiltys son ny meanyn, Alistair Ramsey, gra dy vel y paart jeh cummal co-choyrle theayagh ayns aght er n'gholl fragym as dy vel shin er nakin kuse dy cho-choyrleyn theayagh as bai mooar ayndaue ayns ny bleeantyn jeieanagh t'er n'gholl shaghey, as myr sampleyr t'eh çheet er yn tailley son slaynt : nagh row eh vel sleih coardail rish y tailley slaynt, agh cre'n aght vees sleih smooinaghtyn dy jinnagh y reiltys cur bree da'n tailley slaynt, as dy row shen ny hampleyr jeieanagh. Er-lesh, ec yn eer chooid sloo, dy lhisagh code ennagh feer gheyre er yn aght ta sleih stiurey co-choyrleyn theayagh - foddee ayns rieughid dy vel ad jeant, stiurit dy neu-chrogheydagh trooid y çheu Tinvaal, er cooishyn, dy vel taishbynys firrinagh naeeragh jeh ny cooishyn gys y theay - un aght dy yannoo eh.
Ta Mnr Ramsey gra dy vel yn eie ayn neesht ec sleih dy vel co-choyrle jannoo seose sorçh dy referendum, vees cur sleih er shaghryn, as sleih smooinaghtyn dy row 200 freggyrt ayns foayr as 195 noi echey, nagh vel shen ny t'eh dy yannoo, dy vel eh çhymsaghey barelyn as feanish as foddee ayns aght elley dy beagh eh caillt ec sleih.
Er-lesh Mnr Ramsey dy vel caa mooar dy lhiasaghey co-choyrleyn theayagh, ec y chooid sloo, mannagh vel eh referendum. T'eh gra dy vel code dy ymmyrkey ayn bentyn da co-choyrleyn theayagh, agh dy vel eh smooinaghtyn er red ennagh beggan ny s'geyrey, as er-lesh red ennagh vees currit roish trooid parteays neu-chrogheydagh, gra dy vel ad shoh ny cooishyn, dy vel ad shoh ny feyshtyn, dy jinnagh sleih treishteil ayndaue beggan ny smoo as dy beagh eh currit roish myr taishbynys smoo veih'n çheumooie as smoo naeer.
