Meeryn as Traa dy Liooar, Jelune 22ah Jerrey Geuree 2024
Ta'n Ard Shirveishagh, Alfred Cannan, er vendeil Strateish Tarmaynagh y lught-reill echey, lurg da Olteynyn yn Chiare as Feed son y jiass ceau teiy noi echey ayns soie Tinvaal yn shiaghtin shoh chaie. Lurg resooney magh y strateish rish oor dy lieh, ren shey olteyny yn Chiare as Feed votal noi echey, goaill stiagh ny kiare Oltey son y jiass, dy hoilshaghey magh dy vel ad noi'n Reiltys, lesh baggyrt dy ghooney Loghan Snaue y Jiass.
Ta Mnr Cannan gra dy vel un aght dy chur rish doilleeidyn 'sy cho-voodeeys, shen liorish jannoo shickyr dy vel startaghyn ec sleih, dy vel caaghyn oc as dy vel caghlaaghyn caa oc. T'eh gra nagh vel eh lhiggey er er chor erbee, ayns goaill ayns laue strateish ard-vianagh gollrish shen, nagh vel doilleeidyn cochianglt rish, as dy vel eh er n'ghra roish nish dy vel y politickaght beggan gollrish yn sheanse, as da dy chooilley red jeant ta eiyrtys ry gheddyn kiart noi shen as dy vel feme er goaill ayns laue shiartanse dy reddyn,.
Ta Mnr Cannan gra, myr shoh, dy vel mooarane son reiltys dy yannoo. T'eh gra, my vees sleih cremmey shen, shen mie dy liooar, agh eisht shegin da sleih goaill aash as jeeaghyn er yn reih elley t'ayn, vees dy reayll reddyn myr t'ad, gyn jannoo monney er chor erbee, as dy chur eab er goaill ayns laue ooilley ny doilleeidyn t'er ve ayn ansherbee bentyn da livrey shirveishyn theayagh as dy ghoaill ayns laue ny cooishyn bentyn da cummey y phobble as dy ghoaill ayns laue cooishyn bentyn da bree liorish veg agh ve ny hoie as fuirraghtyn er reddyn taghyrt. T'eh gra dy jinnagh shen seose un strateish.
Ta Mnr Cannan gra dy vel yn argane echey, yn argane veih'n reiltys shoh, veih'n choonceil shoh, as, er-lesh, veih'n chooid smoo dy Olteynyn Tinvaal, shen dy vel ad geearree reddyn dy haghyrt. T'eh gra dy lhisagh shin glackey y caa dy hroggal Ellan smoo share stroshey, er yn oyr dy bee earroo dy eiyrtyssyn jarrooagh ayn. T'eh goaill rish dy vel doilleeidyn cheet veih shoh, as dy vel eh er sleih cur nyn aigney dy eaysley paart jeh ny doilleeidyn shen.
Ta Mnr Cannan gra dy vel ard-vian y reiltys shoh ec ard cheim er jeeraghey ayns rieughid er cur bree vees aa-noaghey, dy yannoo shickyr y traa ry heet son geddyn y lectragh ain, er yn oyr dy vel shen yn oyr smoo son brooightey, agh dy vel eh dy bollagh femoil neesht, er yn oyr dy vel linney traa cochianglt rish y stashoon pooar ain neesht. T'eh gra dy vel dy kinjagh aghtyn dy hareaghey, agh dy vel feme er feddyn cormid rish jeadys troggee vees fo preays mooar ec y traa t'ayn, dy livrey er shoh.
Ta Mnr Cannan gra, eer dy beagh jeihyn dy villioonyn dy phuint ry gheddyn, reesht dy vel eh croghey er sleih er-lheh ve ayns shen dy yannoo eh, myr shoh dy nee bentyn da cormid eh, as nagh vod mayd jannoo dy chooilley red. T'eh gra, er-lesh dy vel fer jeh ny marranyn ec reiltyssyn, shen dy yannoo seose dy chooilley red da dy chooilley pheiagh, as er-lesh dy vel yn lught-reill echey jeeraghey er ny t'ad credjal dy ve lane femoil, as dy vel feme oc er freayll rish goll er oaie lesh yn reayrt as y livrey oc bentyn da kuse jeh ny ayryn elley.
Agh ta Oltey yn Chiare as Feed son Carbory, Balleychashtal as Malew, Tim Glover, ren votal noi'n strateish, gra dy row Mnr Cannan loayrt mychione ellan ayns sheiltynys 'sy tuarastyl bleinoil mychione y Strateish Tarmaynagh. T'eh gra dy vel eh jannoo mooar jeh paart jeh'n ard-vian cheusthie jeh'n strateish t'er jeet roish, agh dasyn dy vel gennid dy vyn-phoyntyn ayn, as t'eh gra neesht, da'n dooinney cadjin 'sy straid, dy vel eh gyn keeayll erbee. T'eh gra dy vel ymmodee sleih 'sy cho-voodeeys ain trooid yn Ellan, cha nee ynrican ayns Carbory, Balleychashtal as Malew, as dy nee baghtal eh dy vel ad strepey ayns rieughid ec y traa t'ayn, as dy vel feme er cur enn er shen, ec y chooid sloo, dy vel eh foin jeeaghyn er goaill ayns laue shiartanse jeh ny doilleeidyn. T'eh gra dy vel bentyn da ve baghtal as bentyn da ve oney rish y phobble, shaghey soilshaghey magh ny t'eh cheet er myr ellan ayns sheiltynys, er yn oyr dy beagh shen myr t'eh jeeaghyn da kuse dy leih va geaishtagh rish.
Er-lesh Mnr Glover dy vel feme bunnidagh er goaill kiarail jeh'n sleih t'ayns shoh hannah, as dy vel doilleeidyn mooarey lesh coontaghyn lectragh, myr sampleyr, myr shoh t'eh bentyn da cormid ve ayn, as mannagh vod shin goaill kiarail jeusyn t'ain hannah, bentyn da reaghey feeackleyryn, bentyn da reaghey rollaghyn faarkee 'sy thieyn lheiys ta ry hoiaghey jeh, bentyn da'n shirveish son slaynt inchynagh – t'eh gra dy vel ad shoh bunnidagh ayns cleayney sleih dy heet gys yn Ellan, myr shoh dy vel yn daa chooish goll cosh ry cholbey.
Ta Mnr Glover gra dy by vie lesh fakin y reiltys goaill rish dy vel ny doilleeidyn shoh jannoo orrin, as dy vel goaill ayns laue shiartanse jeh ny doilleeidyn shoh jannoo yn Ellan foddey ny smoo cleaynagh, as magh ass shen dy chleayney tooilley sleih, dy chleayney fir phrofeshoonagh, etc, as s'baghtal eh dy vel shin laccal ad, as feme ad, agh ta feme er jannoo yn Ellan cleaynagh hannah lesh ny vees shirveishyn bunnidagh undinagh, as er-lesh dy vel shen laccal ec y traa t'ayn.
---oooOooo---
Ta'n Shirveishagh Ynsee, Spoyrt as Cultoor, Julie Edge, gra dy vel feme er reirey dy kiart obbyr er scoill ard noa ayns Balleychashtal. Ta'n shalee bun-argidoil shoh ec yn cheim chiaddey ec y traa t'ayn. 'Sy vlein 2021 va briwnys jeant dy row Scoill Ard Cashtal Rushen ny smoo as ny smoo neu-chooie son yn oyr eck as dy row chymmyltaght fo'n chadjinys eck son studeyryn. Va argid dy hroggal scoill ard ayns ynnyd j'ee currit ry lhiattee hoshiaght 'sy vlein 2016.
Ta sleih jerkal rish 106 shiaghtin goll er ceau er y cheim chiaddey, as lurg shen dy jinnagh ny kiaddaghyn goll roish Tinvaal son coardail 'sy vlein 2026. Ta Bnr Edge briaght, lhisagh driss ve er reddyn nish? T'ee gra dy vel feme er jannoo kiart ee, as feme er jannoo kiart ee ec y cheim chiaddey. T'ee gra dy by vie lhee fakin er yn ynnyd Cashtal Rushen, as dy vel shoh ny vaih argid mooar ashoonagh stiagh 'sy jiass, scoill ard queig bleeaney woish nish, ec keim t'er n'gholl er oaie dy mie, agh dy vel ee geearree freayll rish gra reesht as reesht, dy vel yn lught-reill shoh ny sodjey er oaie na reiltys erbee roish nish, ayns cosney er oaie 'syn ynnyd Cashtal Rushen shen as 'sy scoill.
---oooOooo---
V'eh fo'n Rheynn Ynsee, Spoyrt as Cultoor shirrey er Tinvaal dy choardail rish dooney Loghan Snaue y Jiass ec jerrey Mee Vayrt er yn oyr nagh row argid dy liooar dy chummal seose eh.
Ta Caairlagh Boayrd Loghan Snaue Lughtyn-Reill Ynnydoil y Twoaie, as eh Barrantagh Rhumsaa,, Juan McGuinness, gra, my vees eh fo'n Reiltys jannoo tosheeaght jeh'n chostys jeh cur argid 'sy traa giare erskyn y vondeish ooilley cooidjagh ta snaue cur-lesh da Ellan Vannin, eisht nagh vel ourys erbee echey dy jig eiyrtys jeh shen er seyraadyn elley.
Ta Mnr McGuinness cremmey y tuarastyl, as gra nagh vel eh cheet er ynnydyn spoyrt ardynagh er chor erbee. T'eh gra dy vel feme er jeeaghyn er yn traa haink yn Shirveishagh Edge stiagh ayn, as va geill er ny yeeraghey er ny loghanyn ardynagh, as v'eh inshit dooin nagh row argid ayn as dy row ad geearree jannoo ny sloo ny va goll er chebbal, as magh ass shen haink yn tuarastyl Kavanagh, as magh ass shen haink y tuarastyl er ynnydyn spoyrt ardynagh, agh dy vel eh dy kinjagh cheet reesht gys cur eab er dooney Loghan Snaue y Jiass as freayll argid gys yn towse lhome sloo. T'eh gra nagh vel yn aa-scrutaght er ynnydyn spoyrt ardynagh bentyn er chor erbee da ynnydyn spoyrt ardynagh, as dy vel eh cheet ynrican er dooney loghanyn.
Ta Mnr McGuinness gra dy vel Loghan Snaue y Jiass cheet dy ve shenn, as ayns feme jeh tooilley obbyr dy chummal seose eh, agh nagh vel y Reiltys jerkal rish cur fer elley ayns ynnyd jeh. T'eh gra dy vel y Reiltys cur y dreeym echey da Plan Nyn Ellan son spoyrt as slaynt as yn vondeish ass snaue, as dy vel ad shirrey giarrey costys 'sy traa giare.
Ta Mnr McGuinness gra nagh vel ny loghanyn ayns shen dy ve naeer rere costys, as dy vel argid dy ve ceaut orroo, as dy vel ad ayns shen son vondeish da soccar as slaynt pobble Ellan Vannin. T'eh gra, tra va ny loghanyn troggit 'sy heear as er y twoaie, mysh 15 blein er dy henney, shen va'n eie, as son yn Shirveishagh Edge doaltattymagh dy heet stiagh 'syn oik eck as bunnys dy ghoaill yindys er wheesh t'eh costal dy obbraghey loghanyn, dy vel shen resoon as lheamys ayn.
Er-lesh Mnr McGuinness dy beagh yn eiyrtys smoo resoonagh jeh'n tuarastyl, shen coyrle bentyn da sheshagh argidoil as bargane soiagh as ashlish son y traa ry heet er ny vees ry laccal 'syn Ellan jeh ny loghanyn echey, as dy vod mayd ooilley gobbraghey son shen lesh yn argid cooie. Er-lesh, choud's ta sleih cheet er argid, shen vees goll er coayl, shen yn sleih as ta shoh jannoo orroo, olteynyn y wirran, as eh gra dy vel chymmey echey jeh skimmee loghan y jiass, as va'n fys shen currit daue shiaghtin ny ghaa er dy henney, as ta nyn soie fuirraghtyn er resoonaght ayns Tinvaal, fuirraghtyn er jerrey Mee Vayrt, as olteynyn y wirran 'sy heear as er y twoaie neesht, bee jeeaghyn er shen as imnea oc.
Ta Lhiass Chaairlagh Boayrd Barrantagh Balleychashtal, Beth Cannan, gra, er-lhee, dy lhisagh argid ve ry gheddyn, as dy vel ymmyd mie jeant jeh'n loghan snaue as dy vel y co-voodeeys lhie er son soccar, son lheilys, son keeayll y cho-voodeeys. T'ee gra dy vel ish hene jannoo ymmyd jeh dy mooar, as er lhee dy lhisagh argid ve ry gheddyn.
Ta Bnr Cannan gra dy vel y loghan feer scanshoil da'n cho-voodeeys 'sy jiass, as dy vel ymmodee sleih jannoo ymmyd jeh, as t'ee cheet urree hene reesht, as ish jannoo ymmyd jeh er yn oyr dy vel eh fer jeh agh lheiltys ny ghaa foddee ish jannoo, as s'mie lhee yn traa t'ee goll stiagh ayn dy snaue, as cooilleeney lhiuridyn as smooinaghtyn er reddyn as ceau paart dy hraa kiart er-e-son hene, as er-lhee dy vel shen feer vie. Agh t'ee gra myr co-voodeeys dy vel feme oc er, as er-lhee, ny paitchyn scoill, yn eiyrtys jeh shoh er laa yn scoill, ayns goll gys loghan elley, bee shen feer vooar, as dy jean ad coayl jeh'n ynsagh academoil oc ayns jurnaaghyn barroose.
Ta Bnr Cannan gra dy vel ee smooinaghtyn dy vel sleih feme y loghan 'sy jiass. T'ee gra dy vel eh ny smoo na jus dooney boayl son soccar, she dy stroie ynnyd lane femoil da'n cho-voodeeys. T'ee gra dy vel rate ec Balleychashtal mastey ny fir syrjey jeh thieys sheshoil as cheet stiagh injil 'syn Ellan, as er-lhee, cur tooilley er troailt gys loghan elley, nagh vel shen cairagh, nagh vel eh cairagh orroosyn shen.
Ta Bnr Cannan gra dy vel sleih er loayrt ree, as adsyn briaght mychione ny vees ry yannoo oc, gollrish sleih ta goll dy snaue roish yn obbyr oc. T'ee gra nagh bee eh cho aashagh dy gholl gys Doolish dy snaue rish lieh-oor as eisht dy heet back gys Balleychashtal dy obbraghey. As lessoonyn snaue, lesh eiyrtys feer vooar er laa y scoill, son ny bunscoillyn, er ooilley jeu. T'ee gra dy vel ymmodee sleih er loayrt ree mychione y vuilley jeh shoh er y vea oc, as dy nee bastagh eh as agglagh.
Ta Bnr Cannan gra dy vel ee toiggal dy vel doolaneyn argidoil foin, as dy vel feme er jannoo reaghyssyn doillee, agh er-lhee nagh trimmid dy liooar ve currit er y vuilley sheshoil jeh dooney y loghan shoh.
Va ooilley ny oyryn as arganeyn currit da'n Rheynn Ynsee, Spoyrt as Cultoor, as ec 5.30 fastyr Jeheiney shoh chaie, 19 Jerrey Geuree, ren eh caghlaa yn aigney echey as eh gra dy jinnagh eh freayll rish cur £434,000 dy chooney lesh goll. T'eh gra dy daink shen lurg ny t'eh cheet er myr treealtys vees ry chooilleeney liorish Boayrd Loghan Snaue y Jiass as Olteynyn yn Chiare as Feed as lughtyn-reill ynnydoil y jiass.
Va chaglym eginagh Jerdein shoh chaie, 18oo Jerrey Geuree, as olteynyn Boayrd Loghan Snaue y Jiass, dy chooilley Oltey yn Chiare as Feed son y jiass, as ny lughtyn-reill ynnydoil 'sy jiass kionefenish. Ren Oltey yn Chiare as Feed son Rushen, Juan Watterson, cur roish treealtys dy jinnagh ny lughtyn-reill ynnydoil coardail rish keesh er-lheh, 6.1p 'sy phunt, dy ghientyn argid dy liooar dy lhieeney y varney ta'n Rheynn Ynsee, Spoyrt as Cultoor cheet er, eddyr yn argid vees ry gheddyn veih ny lughtyn-reill ynnydoil as yn argid vees currit stiagh ec yn Rheynn, dy eeck son y loghan snaue.
Lesh y vishaghey shoh, bee 15% jeh'n argid dy stiurey y loghan snaue 'sy jiass ry gheddyn trooid keesh valjagh veih ny lughtyn-reill ynnydoil, agh 'sy heear as er y twoaie cha nel agh 8% ry gheddyn trooid keesh valjagh. Agh cha bee agh argid dy reayll foshlit y loghan snaue myr t'eh, gyn tooilley argid stiagh magh ny bun-argid ry gheddyn, as ta enn ec sleih nagh jean eh cheet lesh y phlan shoh my vees red ennagh failleil dy neu-yerkit.
She plan son y traa giare t'ayn, 'sy jerkallys dy jean plannyn son Scoill Ard Cashtal Rushen noa son shickyrys goaill stiagh loghan snaue, ny yeih nagh row shen er ny eeraghey as nagh vel ry akin ayns ny plannyn myr t'ad ec y traa t'ayn.
Ta'n plan soilshaghey magh dy vel eh neu-chairagh nagh vel cummaltee 'sy hiar geeck son y loghan snaue 'syn Ynnyd Spoyrt Ashoonagh, vees goll er eeck dy bollagh liorish yn Rheynn Ynsee, Spoyrt as Cultoor. Ta sleih gooley dy beagh £500,000 elley ry gheddyn 'sy vlein veih keesh valjagh hoccar trooid yn Ellan, as dy chooilley chummaltagh Vannin geeck son ny loghanyn.
Ayns post ayns ny meanyn sheshoil, ta Oltey yn Chiare as Feed son Rushen, yn Doctor Michelle Haywood, gra dy row sleih cremmey tuarastyl yn Rheynn Ynsee, Spoyrt as Cultoor, ayn v'eh cheet er dooney Loghan Snaue y Jiass dy spaarail argid, er yn oyr nagh vel eh cheet er yn chostys jeh'n eiyrtys jeh dooney er lessoonyn snaue son scoillyn, er lessoonyn lurg scoill, er Club Snaue y Jiass ny er peiagh erbee elley ta jannoo ymmyd jeh'n loghan snaue. T'ee gra dy vel eh erskyn credjal nagh row yn Rheynn gooley ny costyssyn shoh myr ayrn jeh dooney y seyraad.
Ta'n Shirveishagh Ynsee, Spoyrt as Cultoor, Bnr Edge, gra dy vel ee goaill-rish dy row traa feer doillee er ve ayn, as dy by vie lhee cur enn er yn obbyr t'er ve jeant 'sy cho-voodeeys dy chur roish plan vees ry chooilleeney. T'ee gra dy vel ee shickyr dy jean dy chooilley pheiagh coardail dy vel Loghan Snaue y Jiass cheet gys jerrey ny laghyn echey myr seyraad tarmaynagh, as t'ee gra dy vel yn Rheynn jeeaghyn er jannoo cho beg as vees ry yannoo y varney eddyr y seyraad t'ayn nish failleil as lhiassaghey loghan ayns ynnyd jeh.
Ta Bnr Edge gra dy jean ee cur eab er soilshaghey magh roish yn Chiare as Feed laa ny vairagh plannyn ry heet son loghan snaue myr ayrn jeh lhiassaghey Scoill Ard Cashtal Rushen noa. T'ee gra dy vel eh freayll currit da gobbraghey rish dy chooilley voayrd ny loghanyn snaue ardynagh as sleih ayns ny co-voodeeyssyn ynnydoil. T'ee gra neesht dy jean ee shirrey fys baghtal veih buird ny loghanyn snaue 'sy heear as er y twoaie bentyn da'n stayd argidoil oc.
Er-lesh Oltey yn Chiare as Feed son Carbory, Balleychashtal as Malew, Tim Glover, dy vel feme er yn Rheynn shirrey leshtal, as er-lheh jeh olteynyn fwirran y loghan, agh neesht gys Boayrd Loghan Snaue y Jiass as gys pobble jiass yn Ellan, t'er ve dy bollagh jeant corree bentyn da shoh. T'eh gra, my vees red ennagh er n'yannoo unnaneysit ard yn Ellan, as dy vel eh ny smoo na jiass yn Ellan, dy nee cooish ashoonagh ee, bentyn da ny loghanyn, as dy vel shoh raaue, noi cur eab er y lheid shoh 'sy heear ny er y twoaie.
Ta'n Shirveishagh Ynsee, Spoyrt as Cultoor, Julie Edge, shassoo er, nagh vel y fogrey nagh jig Loghan Snaue y Jiass dy ve dooint goll noi ny va'n Rheynn dy ghra roish nish. T'ee gra dy vel y plan harrish ooilley son Scoill Ard Cashtal Rushen goaill stiagh loghan snaue as shey lhoan echey, as dy vel shen er ve 'sy phlan as ayns ny docamadyn son ashlish strateishagh son Cashtal Rushen hug ish er yn Rheynn eck dy yannoo cho leah's v'ee 'syn oik eck. T'ee gra dy row shen ecksh ayns docamad neayr's Mee Averil 2022 agh dy row eh currit roish Olteynyn Tinvaal Toshiaght Arree 2023.
Ta'n Shirveishagh Edge shassoo er neesht nagh row agh moylley eh v'ee er chee cur roish Tinvaal dy ghooney Loghan Snaue y Jiass as nagh vel pooar ecksh dy yannoo shen.
Ta Partee Libraalagh Vannin cur eam er y reiltys myr cooish eginagh dy hur-smooinaghtyn er keesh trooid yn Ellan dy chosney argid son loghanyn snaue ardynagh as yn Ynnyd Spoyrt Ashoonagh. As eh loayrt roish my ren yn Reiltys feeraghey dy jinnagh Loghan Snaue y Jiass tannaghtyn foshlit, dooyr loayreyder ass lieh Partee Libraalagh Vannin dy row eh mollit nagh row argid ry gheddyn son y loghan snaue gyn yn reiltys ronsaghey yn caa dy chur er bun keesh trooid yn Ellan.
Ta fogrey y Phartee gra, 'sy traa sodjey, dy vel eh cur eam er yn Rheynn Ynsee, Spoyrt as Cultoor dy ve currit da cur stiagh ayn loghan noa as seyraadyn soccar elley son y cho-voodeeys myr ayrn jeh ny plannyn son ynnyd Scoill Ard Cashtal Rushen noa. T'eh gra dy vel lughtyn-thie 'sy jiass toilchin pohlldal da'n cheim cheddin son ny paitchyn oc dy ynsaghey yn aght dy snaue as dy lhiassaghey ny schleiyn snaue oc as adsyn ayns ardyn elley yn Ellan.
Ta'n fogrey gra dy vel snaue jannoo seose aght lane yindyssagh son fir aasit dy hannaghtyn ayns foaynoo as slaynt vie trooid ny laghyn oc.
Ta'n Partee cur eam er Tinvaal dy chur preays er yn Reiltys dy chur er bun keesh hoccar trooid yn Ellan dy chur stiagh toyrtyssyn dy chummal seose ny loghanyn sanue as seyraadyn spoyrt elley y cho-voodeeys 'syn Ellan. T'eh gra dy vel eh treishteil dy jean yn Rheynn as dy chooilley Oltey yn Chiare as Feed coardail rish aght feayslee 'sy traa giare dy chur traa dy reaghey red ennagh, er yn oyr dy jinnagh shen soilshaghey magh dy row y Reiltys arryltagh dy hirrey aght feayslee elley, as dy vel Partee Libraalagh Vannin fakin shen myr kesmad jarrooagh dy reaghey aght feayslee son vondeish yn Ellan.
---oooOooo---
Ta bree er ve currit da slattys noa vees cur lhiettrimmys er kiareyder gass veih jee-chiangley shiartanse dy phossanyn dy leih. Mee ny Nollick, va'n slattys currit trooid yn Chiare as Feed as yn Choonceil Slattyssagh ayns un laa, as va Kied Reeoil currit da yn chiaghtin shoh chaie.
Ta'n slattys cur lhiettrimmys er Bree Ellan Vannin jee-chiangley custymeyryn t'ayns gaue ayns meeaghyn y gheurey. Haink shoh lurg da'n cholught goaill toshiaght er jee-chiangley shiartanse dy leih er yn oyr, myr v'eh gra, dy row ad failleil dy loayrt rish y cholught mychione yn lhiastynys oc.
Ta Coonceil ny Shirveishee gra dy jean eh tannaghtyn freayll arrey er yn chooish bentyn da jee-chiangley. Ayns fogrey ta Shirveish Oik Coonceil ny Shirveishee, Kate Lord-Brennan (Glionfaba as Purt ny Hinshey) gra nagh lhisagh coadey ve ec cummaltee Vannin ny sloo na shen ec sleih vees baghey ayns buill elley ayns ny Hellanyn Goaldagh.
S'lickly eh dy jed yn Oardyr Reilley Gass (Cur Lhiettrimmys er Jee-Chianglaghyn) 2024 roish Tinvaal son coardail jarrooagh 'sy vee shoh cheet, agh ta bree echey chelleeragh. Ta'n Reiltys er chur fys mychione shirveishyn coyrlee er lhiastynys my vees doilleeid ec cummaltee eeck coontaghyn.
---oooOooo---
Ta'n sheshaght ghiastyllagh, Foayr Eash Ellan Vannin, gra dy vel eh foast er shiartanse dy hanstyryn reih eddyr chiow ny ee er yn oyr dy vel doilleeid oc er coontey y chostys bea. Nurree ren yn Reiltys cur £100,000 ayns tashtey son ynnydyn cheh 'sy cho-voodeeys, as ren Foayr Eash Ellan Vannin cosney argid magh ass shen. Agh cha nel yn tashtey ayn mleeaney.
Ta Steve Dawson jeh Foayr Eash Ellan Vannin gra dy row yn argid feer ymmydoil, as dy ren eh geeck son ymmodee lhongaghyn er-son y cheshaght ghiastyllagh, er yn oyr dy row 60 ny 70 peiagh cheet. T'eh gra mleeaney, by hreih eh, nagh vel argid ry gheddyn veih'n Reiltys, myr shoh eddyr Foayr Eash Ellan Vannin as Legion Vannin, choud's ta priosyn gass er jeet neose, dy vel priosyn lectragh er n'gholl seose, as dy vel doilleeid ec ymmodee sleih, as lesh kenjallys jeh earroo dy ghoshtiuyn, dy vel eh er jeet lhieu jannoo reesht eh. T'eh gra dy vel kiare lhongaghyn elley ry heet, as yn nah er 25 Jerrey Geuree, as eisht 8 Toshiaght Arree, as 22 Toshiaght Arree as 7 Mee Vayrt ec y traa t'ayn.
Ta Maureen Cowbourne jeh Foayr Eash Ellan Vannin gra dy ren yn sheshaght ghiastyllagh shickyr dy row argid dy liooar eck dy gholl gys Mee Vayrt, as eisht, myr dooyrt Steve Dawson, dy jean ad aa-scrutaghey eh, as my vees eh foast myr shoh, as oddys eh y ve, dy jean ad tannaghtyn lesh.
Ta Mnr Dawson gra dy vel yn sheshaght ghiastyllagh boirit mychione shanstyryn 'sy cho-voodeeys, dy vel ad feme sheshey, dy vel feme oc er loayrt rish sleih, as dy vel feme oc geddyn bee. T'eh gra dy vel earroo dy leih er heet er chiow ny ee, as dy vel yn reaghys jeant ec Foayr Eash dy nee scanshoil eh dy vel lhongey cheh oc, as lesh cooney y voayrd oc as Legion Vannin dy vel ad er n'ghoaill ayns laue eh, as dy row eh er jeet lhieu dy mooar. T'eh gra, lesh yn earroo dy leih haink ec y Nollick, myr sampleyr, beggan ny shlee na cheead dy leih, cre cho booisal as v'ad jeh ny ta'n sheshaght ghiastyllagh cur eab er jannoo.
Ta Mnr Dawson gra, neayr's ren ad goaill toshiaght, mysh 12 ny 18 mee er dy henney, dy vel yn earroo dy leih er n'gholl seose dy reiltagh, as nagh vel dooyt erbee mychione shen. T'eh gra dy vel tashtey noi creoighys ec yn cheshaght ghiastyllagh, as dy vel ad cur eab er cooney lesh sleih wheesh as t'ad abyl, agh dy vel cagliagh er ny vees ry yannoo, as dy row yeearreeyn ny screeunyn son cooney, as dy vel kuse jeh ny coontaghyn er ve agglagh, mysh £1,500 ny £1,600.
Ta Mnr Dawson gra, boayl erbee t'ad reaghey dy chur eab er cooney, nagh jean shen caghlaa monney, as dy vel yn coyrle oc hoshiaght dy lhisagh sleih loayrt rish colught y vun-shirveish 'sy chooish, er yn oyr, fy yerrey hoal, nagh vel peiagh erbee geearree sleih dy ve jee-chianglt. T'eh gra dy vel ny ynnydyn cheh ny voayl yindyssagh er yn oyr dy vel caa daue cheet dy loayrt roo, as dy vod ad soie 'sy chorneil as goaill cowag as stiurey ad 'sy raad kiart bentyn da'n sleih lhisagh ad loayrt rish.
---oooOooo---
Ta Oltey yn Chiare as Feed son Doolish Veanagh, Ann Corlett, gra dy vel yn Rheynn Bun-Troggalys soilshaghey magh nagh vel eh cur geill erbee da kiarail Tinvaal bentyn da caglieeyn er bieauid carbid. By vie lhee fakin cagliagh jeh 20 meeiley 'syn oor ayns ardjyn cummalagh.
V'eh currit er yn Rheynn Bun-Troggalys dy chlou tuarastyl er y chooish Mee Vayrt 2021, as reesht nurree, agh cha nel eh eh n'yannoo shen, as yn Shirveishagh, Tim Crookall (Glionfaba as Purt ny Hinshey) cheet er caghlaaghyn 'sy Rheynn myr fer jeh ny oyryn son shen.
Agh er-lesh Bnr Corlett dy lhisagh y tuarastyl shoh jannoo seose tosheeaght son yn Rheynn. Tee gra dy row shoh kiarail Tinvaal, jeh'n un aigney, daa cheayrt, dy lhisagh caglieeyn er bieauid ayns ardyn cummalagh, as er-lheh mygeayrt scoillyn, trooid yn Ellan,ve currit er bun, as va'n currym er yn Rheynn dy chur tuarastyl mychione yn aght yinnagh eh cooilleeney shen, as dy vel shin foast fuirraghtyn er shen.
Ta Bnr Corlett gra dy voddagh y Reiltys jannoo ny sinshley y cagliagh er bieauid as troggal seose ny cowraghyn, as eisht goaill ayns laue ny doilleeidyn ayns ny buill t'ad taghyrt, shaghey cur eab er jannoo red ennagh rolaue, as lhig dooin fakin ny vees taghyrt. T'eh goaill toshiaght er gra dy vel doilleeid lesh poleeney shoh, agh eisht t'ee caghlaa yn aigney eck dy ghra, er-lhee, nagh vel doilleeid lesh poleeney. T'ee gra nagh vel anchaslys eddyr poleeney 20 meeiley 'syn oor na poleeney 30, 40, 50, 60, dy vel eh y poleeney jeh'n sorch cheddin.
Ta Bnr Corlett coardail dy vod shamraigyn beauid goll er ymmydey, as dy vel shen red ennagh as va caa da jannoo seose ayrn jeh'n oardagh shirrey coyrle bentyn da Balleykermeen, agh dy row shen shalee feer veg, agh dy vel feme er goll magh as briaght jeh sleih jinnagh ad coardail rish shen.
Er-lesh Bnr Corlett, dy row y Reiltys agh dy yannoo ny sloo y bieauid mygeayrt mean yn ard Ghoolish as mygeayrt Balleykermeen, dy yannoo agh prowalys jeh, nagh vel shen red vees costallagh dy yannoo – caghlaa y slattys as cur seose y cowrey.
Ta Bnr Corlett gra dy vel ee smooinaghtyn ayns rieughid dy vel yn Rheynn Bun-Troggalys soilshaghey magh nagh vel eh cur geill er cor erbee da kiarail Tinvaal, as nagh vel shen ry hoaiaghey jeh. T'ee gra, mie dy liooar, mannagh row yn traa ny'n ablid echey dy yannoo slane tuarastyl, eisht dy lhisagh eh cheet back lesh fys mychione ny t'er n'gholl er oaie ny, mannagh vel veg er n'gholl er oaie, cheet back as insh da Tinvaal yn oyr son shen, shaghey ceau neu-hastid da kiarail Tinvaal, as nagh vel shen kiart.
---oooOooo---
Ta'n Shirveishagh Cooishyn Sthie, Jane Poole-Wilson, gra dy vel shickyrys ny puirt er jeet dy yannoo seose tosheeaght son yn Rheynn eck. Veagh shickyrys s'chenney magh ass shoh 'sy stashoon marrey as 'sy phurt aer.
Ta Bnr Poole-Wilson gra dy vel yn Rhenn jeeaghyn er kuse dy reihyn. T'ee gra, bentyn da Enn Automatagh er Claareyn Earroo, dy vel yn Rheynn ayns stayd as lhisagh eh ve abyl dy gholl er oaie lesh shen aashagh dy liooar. T'ee gra dy vel enn er eddinyn beggan ny smoo cramp er yn oyr dy vel feme er jeeaghyn er kuse dy chooishyn slattyssagh bentyn da shen, agh dy vel eh, son shickyrys, mastey ny agenda, as dy vel eh red ennagh ta'n Rheynn shirrey, lesh kuse dy hroaghyn dy obbraghyn elley bentyn da shickyrys ny puirt as myr shen. T'ee gra, myr shoh, dy jean yn Rheynn goll er oaie lesh shen.
---oooOooo---
Ta Oltey yn Chiare as Feed son Carbory, Balleychashtal as Malew, Jason Moorhouse, gra dy vel eh mie erskyn credjal dy vel yn eab echey dy aa-scrutaghey Colught Paggad Bree Ellan Vannin er chur er Tinvaal coardail rish cur er bun bing dy yannoo shen.
Va Mnr Moorhouse geearree sessal beagh caa dy yannoo ymmyd jeh Lught-Reill Gurneil yn Eddyr-Insh as ny Bun-Shirveishyn dy oaseirey y colught, agh ren Tinvaal reih ayns ynnyd jeh shen dy chur er bun bing reiht dy yeeaghyn er y Choardailys er Shirveishyn Marrey as stayd yn Tashtey myr ronneyder. Nee'n ving reih cur tuarastyl roish Tinvaal Mean Fouyir.
Ta Mnr Moorhouse gra, ec y traa t'ayn, dy vel dy chooilley pheiagh coayl 'sy chooish. T'eh gra dy vel ny custymeyryn gennaghtyn nagh vel ad goll er cur-rish ayns aght mie dy liooar; dy vel adsyn cur eam er politickeyryn as dy vel ny politickeyryn gra dy vel shoh stayd as ta'n colught goll er freayll cheumooie; dy vel feyshtyn ry gheddyn ayns yn Chiare as Feed as Tinvaal; dy vel adsyn goll gys ny meanyn; as ayns ynnyd jeh stayd as y colught goll er freayll cheumooie, dy vel eh jeeaghyn dy ve stayd as sleih goaill ayrn ayn.
---oooOooo---
Ta Barrantee Carbory as Rushen er choardail rish bishaghey y cheesh valjagh 'syn ard liorish 7.5%, as shen dy ghra liorish 12p elley. Hig y cheesh valjagh nish dy ve 174 ping 'sy phunt, as ta ny Barrantee gra dy vel beggan ny smoo na lieh-ayrn ny costyssyn oc scarrit lieh as lieh eddyr Ynnyd Baljagh Jeelym y Jiass as geddyn rey rish orch. Bee'n chooid elley ceaut er shirveishyn ny raaidyn mooarey, chaglym orch as argid faill, vees jannoo seose beggan yn trass ayrn jeh costyssyn ny barrantee.
Ta ny barrantee er choardail neesht rish y cheesh valjagh jeh 6.1 ping 'sy phunt son Loghan Snaue y Jiass. Ta'n bishaghey 12p reaghit myr shoh: 3p son Ynnyd Baljagh Jeelym y Jiass; 2.5p son geddyn rey rish orch; 2.5p son shirveishyn raaidyn mooarey, chaglym orch, giarrey faiyr as cummal seose; 2.5p dy eeck son yn lhiastynys bentyn da Pairk Ballakilley; as 1.5p son bishaghyn elley er coontey bolgey argidoil.
Ta'n Caairlagh, Stan Pilling, gra dy vel ny Barrantee er n'yannoo dy chooilley red vees ry yannoo oc dy reayll heese ny costyssyn oc, agh dy vel paart mooar jeh'n vishaghey mleeaney er jeet er coontey conaantyn ny slattys. T'eh gra, ny yeih shen, dy vel keesh valjagh Carbory as Rushen foast ny sinshley na ard elley 'sy jiass, choud's ta shirveishyn jeh mieys foast goll er cooilleeney.
---oooOooo---
Ta Barrantee Balleychashtal er chur stiagh yeearree phlannal dy lhieggal eear stashoon ny moogheyderyn aile. Roish nish v'eh currit magh er barganeyn soiagh da colughtyn beggey, agh ta'n reaghys shen er jeet gy kione. Ta ny Barrantee gra dy vel ad geearree tooilley reamys dy phairkal carbid, as my vees coardail currit da lhieggal yn eear stashoon dy jinnagh shen cur ny smoo na dooble yn earroo dy ynnydyn pairkal vees ry gheddyn 'sy valley, veagh 36 ooilley cooidjagh, goaill stiagh kiare ynnyd son anlheiltee as kiare poynt laadey lectragh. Ta ny Barrantee ec y traa t'ayn jeeaghyn er aghtyn dy yannoo beayn y reaghys dy vel Kerrin y Vargee son coshee ynrican.
---oooOooo---
Ec jeih er y chlag moghrey jiu haink toshiaght er brialtys theayagh mychione yeearree Barrantee Rhumsaa dy heeyney magh caglieeyn y valley. Ta ny Barrantee gra dy vel dy chooilley red jeant wheesh as oddys eh y ve lesh troggal as lhiassaghey y valley, as nagh vel aght elley dy lhiggey da Rhumsaa bishaghey agh liorish sheeyney magh.
Ta ny lughtyn-reill ayns Lezayre as Garff shassoo noi y yeearree, liorish veagh towse mooar dy liooar dy halloo caillt oc. Veagh Glion Auldyn as Raad Jurby as Raad Lezayre caillt da Barrantee Lezayre, my vees Rhumsaa sheeyney magh ny caglieeyn echey, as yn argid veih'n cheesh valjagh caillt ec y lught-reill ynnydoil. Ta ny Barrantee gra dy beagh builley mooar er dy chooilley tackeyder er y twoaie vooar. Ta Barrantee Garff gra dy vel y thalloo ta Barrantee Rhumsaa cheet er ayns ymmyd son eirinys, as nagh vel eh cooie son troggal 'syn aght ta Barrantee Rhumsaa cheet er.
Ta'n brialtys goll er cummal ayns Thie Aaght y Phairk ayns Rhumsaa, as hig feanish veih cummaltee, veih Barrantee as veih Olteynyn yn Chiare as Feed.
