Meeryn ass Traa dy Liooar, Jelune 12ah Mee Luanistyn 2024
Roish dooin goll er y hoshiaght dy yeeaghyn er cooishyn yn laa ayns shoh 'syn Ellan, jiu haink toshiaght er Festival Interceltique de Lorient, as reesht ta possan jeh mysh three feed dy leih er n'gholl gys y valley ard shen 'sy Vritaan dy ghoaill ayrn. Ren ad reaghey dy chummal feailley beggan ny s'girrey mleeaney er yn oyr dy row ny Gammanyn Olympagh goll ayns Paris derrey'n laa v'ayn jea. Ny yeih shen as ooilley, ta'n chied chione shiaghtin jeh'n eailley ayns Lorient currit dy cadjin gys ny bagadoú, ny bannyn piob as drum ta cho ennoil 'sy cheer shen.
Va tradishoon jeh sleih cloie poibyn jeh sorch ennagh 'sy Vritaan. Sorch dy henn oboe ta'n bombarde, ny talabard, myr t'eh 'sy Vritaanish, as ta'n cuirtlagh goaill er goaill 'sy veeal as ta ny cloiederyn sheidey dy jeeragh trooid y chuirtlagh, as cha nel poagey cochianglt rish. 'Sy tradishoon shen ta piob veg as poagey cochianglt rish enmyssit y biniou koz – koz, shen dy ghra shenn. Ta'n bombarde cadjin gollrish y chanter jeh sett dy phoibyn ta sleih oayllagh rish ass Nalbin, as ta'n biniou koz cloie octave ny syrjey. She'n talabardier, yn cloieder bombarde, ta reih ny carryn, as t'eh cloie, as choud's t'eh tayrn ennal ta'n biniou koz cloie y meer cheddin jeh'n charr as va goll er cloie er y vombarde, roish my vees y talabardier cheet stiagh reesht.
Ayns jiass y Vritaan, 'syn ard t'ad gra rish y Vro Wenn, y Cheer Vane, er yn oyr dy vel ad cosney sollan veih'n vooir 'syn ard shen, 'syn ard shen t'ad cloie poib as poagey cochianglt rish vees ny smoo na'n viniou koz, as t'ad gra rish y veuze, as ayns shen ta'n bombarde as y veuze 'syn octave cheddin.
Shen y tradishoon jeh poibyn 'sy Vritaan, agh ec jerrey nah chaggey yn theihll va ny Britaanee jannoo mooar jeh ny bannyn poib as drum Albinagh v'ayns shen lesh yn Cheshaght Chaggee Ghoaldagh, as magh ass shen hug ad er bun bannyn poib as drum er nyn son hene, jannoo ymmyd jeh ny poibyn jeh'n sorch cheddin as ta goll er cloie ayns Nalbin, agh ren ad goaill stiagh bombardeyn neesht, as t'ad gra rish bann gollrish shen bagad, as yn ylrey jeh bagadoú..
'Sy lhing shoh, chammah's bombarde cadjin, t'ad cloie bombardeyn jeh lhiuiridyn elley ayns octaveyn elley, as t'ad jannoo ymmyd jeh yn treujenn gaol neesht, shen dy ghra shenn chlarinet – sorch dy chlarinet shenn emshiragh eh gyn whilleen ogher er. As ta piobyn jeh sorchyn elley goll er cloie eisht as nish neesht, goaill stiagh y biniou koz as yn veuze.
Ta ayrn jeh ny bannyn goaill stiagh drummyn, as ymmodee jeu kiart gollrish bann piob as drum Albinagh, agh reesht t'ad goaill stiagh drummyn mooarey as ymmyd jeant jeu beggan gollrish tympani. Ta kit dy ghrummyn gollrish orchestra ny bann pop, as ta conga as bongo as drum jeh dy chooilley horch, cajon, red erbee vees jannoo sheean tra t'eh goll er craa ny bwoalley. T'ad jannoo ymmyd jeh pannyn staillin myr ta ry gheddyn ayns y Charibbean neesht, as cluig tubeagh.
S'mie lhiam ny bagadoú, as ta mee jeeaghyn magh son Championnat des Bagadoú ayns aght nagh vel mee jeeaghyn magh son ny Worlds, myr t'ad gra rish y chohirrey eddyr-ashoonagh vees goll er cummal ayns Glasgow son bannyn piob as drum Albinagh – ta mee jannoo ymmyd jeh Albinagh myr yn aght t'ad cloie, agh ta bannyn goaill ayrn ass Nalbin, kiart dy liooar, as ass Nerin – as cha nee ynrican 'sy twoaie – ta bann feer ennoil t'er chur laue y varriaght er yn aundyr ass Divlyn, as shen Bann Piob Noo Laurence O'Toole, as bannyn ass y Chanada, gollrish Bann Piob yn Olloo-scoill Simon Fraser, as ta ymmodee bannyn 'syn Australia as 'sy Zeelan Noa. As ta Bann Piobyn as Drummyn Ellan Vannin ayn neesht.
Ansherbee, ga dy vel mee jeeaghyn er ny claareyn er y chellveeish, er BBC Alba, tra t'ad soilshaghey magh Na Worlds, myr t'ad gra roo, cha nel mee cheet dy ve cho greesit as ta mee tra ta mee fakin dy vel yn traa er jeet son Championnat des Bagadoú. Ta paart jeh ny bagadoú cloie ayns aght vees feer tradishoonagh, lesh gwerzioú as carryn daunse ass y Vritaan, agh ta paart jeu cloie sorch dy jazz neesht, as sheeanyn noa cheet magh assdaue ooilley yn traa.
Agh ghow mee toshiaght er gra shoh er yn oyr dy row mee er chee cheet er yn nah vout jeh Championnat des Bagadoú va er ny chummal ayns Lorient fastyr jea. Lurg yn chied vout ayns Brest, Toshiaght Arree 2024, shen Bagad Cap Caval va 'sy chied ynnyd, lesh yn vann smoo speeideilagh 'sy chohirrey, Bagad Kemper, 'sy nah ynnyd, as Bagad Brieg 'sy trass ynnyd. Reesht jeh, ren Bagad Cap Caval cur laue y varriaght er yn aundyr, as v'eh 'sy chied ynnyd reesht, as magh ass yn daa vout, she Bagad Cap Caval ta penbagad y Vreizh mleeaney.
Agh ga dy row mee gra dy row Bagad Kemper y bann smoo speeideilagh ayns ooilley ny bleeantyn neayr's va'n Championnat currit er bun, cha daink eh lhieu er chor erbee jea, as ga dy row ad 'sy nah ynnyd ayns Brest, y cheayrt shoh ayns Lorient cha row ad agh 'sy wheigoo ynnyd. Shen dy ghra dy row jeih bagadoú foue, agh dy yannoo caghlaa dy row kiare bagad er-nyn-skyn ayns Lorient. Lesh y nah ynnyd ayns Brest as y wheigoo ynnyd ayns Lorient, cha row Bagad Kemper agh 'sy trass ynnyd mleeaney ooilley cooidjagh 'sy Championnat. Haink Bagad Cap Caval dy ve'n penbagad reesht, lesh yn chied ynnyd ayns yn daa vout, as 'sy nah ynnyd ooilley cooidjagh 'sy Championnat, lesh y trass ynnyd ayns Brest as y nah ynnyd ayns Lorient, va Bagad Brieg.
Eiyrtys neu-chadjin son Bagad Kemper v'eh mleeaney, son shickyrys, agh moylley as soylley reesht da Bagad Cap Caval. Ta'n bann shen soit ayns Plomeur, 'sy Vro Vigouden, vees ny lhie sheear-hwoaie veih Lorient. T'ad woish yn ard shen, Cap Caval, as shen dy ghra dy vel cummaltagh yn ard shen enmyssit Cavallec, myr shoh t'eh jeeaghyn dy row shenn vooinjer yn Ellynagh, Bruno Cavallec, ta baghey ayns Purt ny Hinshey nish, ass yn ard shen, ga dy vel Bruno hene ass balley vees ny lhie my yiass veih Lorient, Étel.
---oooOooo---
Agh nish, lhig dooin goaill toshiaght er feddyn magh ny vees goll er 'syn Ellan ec y traa t'ayn.
---oooOooo---
Ayns Traa dy Liooar Jelune shoh chaie cheayll shin mychione imnea feer vooar ec cummaltee er y twoaie vooar mychione caslys cheerey va currit stiagh ec y vinnid s'jerree myr ayrn jeh Plan Ard y Hwoaie as y Heear va soilshaghey magh kiarail y Reiltys dy chur lhiettrimmys er lhiassaghey 'sy traa ry heet ayns Jourby, dy chur caa dy heeyney magh bollagh roie yn eear vagher aer ayns shen as dy hroggal purt aer ashoonagh noa mysh y mooadys cheddin as Purt Aer John Lennon Leyrphoyl.
Haink shoh myr slane yindys da sleih, as cha row co-choyrle theayagh erbee rolaue er y chooish. Agh lurg plaiyntyn ny cummaltee 'syn ard, cha jean Plan yn Ard goaill stiagh y chooish shoh er chor erbee. Ta fer jeh ny cummaltee, Vicki Wade, gra dy nee baghtal eh nagh ren ad geiyrt er yn oardagh cooie 'sy chooish shoh, as nagh row sleih goit stiagh myr ayrn jeh er chor erbee. T'ee gra dy vel ny cummaltee son shickyrys maynrey dy heet gys yn chied dean shoh, son shickyrys.
Agh ga dy vel cummaltee jeant booiagh liorish shen, cha nel shen dy ghra dy vel y chooish er jeet gy kione. Ta fo-rheynn ny Puirt Aer da'n Rheynn Bun-troggalys er n'ghra dy vel eh currit da loayrt dy slane rish sleih, goaill stiagh cummal keirdlannyn jeeraghey er cooishyn er-lheh, ayns ny co-voodeeyssyn orroo yinnagh yn eie shoh jannoo, myr ayrn jeh plan mainstyragh y fo-rheynn son Purt Aer Runnysvie. Nee'n plan mainstyragh ronsaghey reihyn strateishagh 'sy traa sodjey dy yannoo ny share ny ny sloo cooishyn bentyn da ymmyd jeh Runnysvie, oddys goaill stiagh sur-smooinaghtyn reesht er lhiassaghey Magher Aer Yourby.
Agh ec y traa t'ayn, ta'n Rheynn Bun-troggalys aa-reaghey ny t'eh cheet stiagh ayns Plan Ard y Hwoaie as y Heear dy gheddyn rey rish sheeyney magh cummyssagh y vagher er 'sy traa ry heet. Agh ta fogrey er ve clouit dy ghra dy row saaseyn dy choadey magher aer Yourby as y thalloo mygeayrt-y-moee er ve ayn neayr's 2004. T'eh gra dy jean yn Rehynn loayrt rish y cho-voodeeys ynnydoil 'syn ouyr dy hoilshaghey magh dy slane y feme er freayll rish coadey thalloo mygeayrt y vagher aer as yn eiyrtys cummyssagh jeh sheeyney magh y vagher aer er-nyn-son ta baghey as gobbraghey ayns Jourby as 'syn ard shen.
Ta fogrey y Rheynn gra dy jean plan mainstyragh y phurt aer, vees goll er lhiassaghey ec y traa t'ayn, ronsagh plannyn dy hareaghey as dy chur gys ny seyraadyn t'ayn hannah ayns jiass yn Ellan, as nee eh goaill stiagh paart vees goll er cooilleeney ec Magher Aer Yourby ec y traa t'ayn, as shen foddee ve femoil 'sy traa sodjey ry heet dy yannoo shickyr dy vel cochianglyssyn aer yn Ellan goll er coadey.
V'eh fo Barrantee Jourby cummal chaglym dy loayrt mychione y chooish shoh, as t'ad gra dy jean ad foast loayrt mychione eck 'sy chaglym veeoil oc fastyr beg jiu. T'ad gra dy vel ad currit da yannoo shickyr dy vel y Reiltys geiyrt er oardagh cooie 'sy traa ry heet.
---oooOooo---
Ta'n Shirveishagh Chymmyltaght, Bee as Eirinys, Clare Barber, goaill rish dy vel foast earroo dy yeearreeyn dy chur-rish bentyn da recortey troggalyn, as nagh vel yn Rheynn goaill ayns laue ad cho tappee as by vie lesh. Va three oaseiryn noa faillt Mee Voaldyn, as ta treisht er yn Rheynn dy jean adsyn cooney dy obbraghey trooid ny yeearreeyn ta foast er-mayrn.
Ta Troggalyn Recortit adsyn as ta enn currit orroo myr symoil er coontey yn aght v'ad kiaddit ny bentyn da'n shennaghys oc. Agh ta Bnr Barber goaill rish dy vel rour traa goll er ceau er cur-rish ny yeearreeyn. T'ee gra dy vel towse mooar dy liooar dy clattys vees cochianglt rish, as t'ee cheet er Slattys Gurneil Troggal, bentyn da Troggalyn Recortit, as dy vel shen y coarys t'ain ayns shoh. T'ee gra, tra ta sess jeant jeh troggal, as dy nee oardagh liauyr dy liooar eh dy hessal, as tra ta briwnys jeant dy vel troggal symoil er coontey y shennaghys echey ny'n aght v'eh kiaddit, eisht dy beagh recortys currit er, as dy vel eh cheet dy ve ny Hroggal Recortit.
Ta Bnr Barber gra, eisht tra ta ny cooishyn shen sur-smooinit er, dy vel keim syrjey ayn son sur-smooinaghtyn er, vees jeant as currit da ny troggalyn shen, as er-lhee dy vel shen kiart as ny veagh dy chooilley pheiagh treishteil dy beagh ayn.
Ta Bnr Barber gra, ny keayrtyn, dy vel earroo dy leih cur feysht mychione yn oyr nagh vel troggal recortit, as dy lhisagh shin recortey y troggal shen, as dy vod shen goll dagh tro, as er-lhee dy vel shin er nakin sleih goaill troggalyn shenndeeagh as cur-lesh ad gys ymmyd noa-emshiragh, er yn oyr dy vel ish son shickyrys goaill rish nagh vod shin ynrican freayll reddyn myr sharmaneys, er yn oyr dy vel feme er toiggal yn aght dy tarmaynagh foddee shen ve keeayllagh son y shellooder, as dy vod shen caghlaa, as dy vel eh ny lhie er yn sorch dy hroggal ta sleih cur eab er coadey.
Er-lesh Bnr Barber, bentyn da Troggalyn Recortit, ayns rieughid dy vel cormid mie dy liooar ain, fo ny harrish – er-lhee dy vel eh cairagh dy ghra shen, as dy jinnagh ish smooinaghtyn er dy row paart dy hraa ayn as nagh row eh cheet lhieu recortey ad cho tappee as by vie lhieu, as dy row kuse jeu as v'ad faagit, nagh row sur-smooinit er dy formoil, as dy vel shen oyr son paart y voirey er yn oyr ny keayrtyn dy vel yn traa as ta recortey cheet dy ve femoil, shen yn traa t'eh goll gys shellooder elley, as foddee ad feddyn eisht peiagh ennagh bunnys cheet stiagh ayns stayd nagh row eh jerkal rish, myr shoh dy vel ee goaill-rish dy vel yn obbyr vees nish fo raad dy chur eab er gobbraghey trooid y rolley shen dy hroggalyn as foddee dy vel ad cooie son ve recortit, ny veer feer scanshoil dy obbyr..
Ta Bnr Barber gra, tra ta shin jeeaghyn er y staddystaght jeh ny yeearreyn son Troggalyn Recortit vees coardit, dy vel eh ard erskyn cadjinys, as shen er yn oyr dy vel oaseiryn yn Rheynn son Troggalyn Recortit geearree gobbraghey marish shellooderyn ny troggalyn shen dy gheddyn magh aghtyn feayslee, er yn oyr dy vel eh jeh vondeish da dy chooilley pheiagh dy gheddyn aghtyn feayslee, shaghey lhiggey da ny troggalyn shen cheet dy ve ayns stayd dy vel ad tholtanagh.
Bentyn da shellooderyn Troggalyn Recortit, ta Bnr Barber gra nagh vel ad faagit mooie, choud's t'ee toiggal eh, jeh Skeim Bun-troggalys yn Ellan, myr sampleyr, myr shoh ayns rieughid dy vel caa dy cummyssagh da peiagh ennagh as ta Troggal Recortit echey dy ronsaghey shen myr caa. Aght t'ee gra, bentyn da skeim er-lheh, nagh vel shen red ennagh vees ayn ec y traa t'ayn. T'ee gra dy row ad gennaghtyn ayns rieughid dy row yn towse jeh'n sym dy argid veagh femoil cho mooar dy row eh doillee dy arganey dy row shen yn tosheeaght erskyn dy chooilley red elley.
Ta Bnr Barber gra dy vel ee goaill-rish dy vel kuse dy ghoolaneyn, dy by chosoylagh eh, 'sy traa sodjey bentyn da'n aght ta'n Rheynn cooney lesh sleih as ocsyn ta Troggalyn Recortit, agh er-lhee cur eab er jannoo red ennagh as nagh vel ad cur agh poht beg dy argid, ayns rieughid nagh vel eh jannoo caghlaa erbee, as dy by lickly eh nagh vel shen yn aght kiart dy ghoaill ayns laue eh.
My vees peiagh ennagh lhiggey da Troggal Recortit cheet dy ve ayns stayd boght, ta Bnr Barber gra dy vel oardagh formoil ayn as caa dy eiyrt er shen, agh dy vel eh doillee, as er-lhee dy vel ad geearree reesht feddyn y cormid shen jeh gobbraghey marish sleih, shaghey cur eab er kerraghey ad hoshiaght. T'ee gra dy vel oardaghyn ayn dy chur bree ta ry gheddyn eck, agh dy bare lhee dy kinjagh gobbraghey marish sleih, shaghey goll dy jeeragh ayns aght ennagh dy chur bree.
---oooOooo---
Ta'n colught vees geearree troggal gowaltys geayee mooie veih coose hiar yn Ellan gra dy vel caghlaaghyn freggyrt er jeet stiagh da'n cho-choyrle theayagh echey er ny treealtyssyn echey. Yinnagh shalee Ørsted, Mooir Vannin, goaill stiagh whilleen as 100 turbeen geayee, lesh yn chooid smoo jeh'n lectraght goll er gientyn son margey y Reeriaght Unnaneysit. Ayns strane dy haglymyn theayagh, va imnea mychione yn eiyrtys er coorseyn shiaulley as mychione builley sooilley yn ynnyd.
Ta John Galloway jeh Ørsted gra dy vel ny taghyrtyn myr ayrn jeh'n cho-choyrle theayagh er ve greinnaghey feer vooar, as dy vel eh ersyn gra dy vel eh jannoo mooar jeh'n aght ta sleih er jeet dy loayrt er y chalee, chammah's liorish post-l as screeuyn as feyshtyn va currit orroo, as t'eh gra dy row ad cur freggyrt daue ooilley dy jeeragh, as dy jinnagh eh greinnaghey sleih dy reayll rish cur eam er y cholught y clane raad trooid derrey hig kione er y cho-choyrle yn 11 Mean Fouyir. Ta Mnr Galloway gra dy nee red anaasagh eh bentyn da barelyn cheet stiagh ayn, shen ny keayrtyn dy nee neu-hoiggalys eh dy vel y colught jannoo eh er yn oyr dy vel eh ersyn.
Ta Mnr Galloway gra dy row oyr ec yn cholught ayns cummal co-choyrle theayagh y sourey shoh, as shen er yn oyr dy vel y colught plannal dy chur stiagh yeearree phlannal gys y Reiltys rere Slattys Reirey Bun-troggalys Marrey, dy vel y colught plannal dy yannoo shen y nah arrey, as dy vel shen traa dy liooar veih nish, as dy vel oyr da ve traa dy liooar veih nish, as shen er yn oyr dy vel feme er y cholught son traa dy ghoaill ny barelyn currit stiagh ayn as dy aa-scrutaghey ad as dy chur ad dy aa-heeley y treealtys echey. T'eh gra dy vel shen ayns claare Ørsted, as dy vel kuse dy hiaghteeyn echey, dy jarroo kuse dy veeaghyn, ooilley cooidjagh dy chur geill da ny barelyn t'er jeet stiagh ayn er caghlaaghyn cooish, as hannah dy vel eh soilshaghey magh kuse dy chooishyn, son shickyrys, myr vees ry heiltyn, veih'n theay as vouseyn cochianglt rish y chooish.
Ta Mnr Galloway gra dy vel Ørsted dy feer cur geill trome da barelyn cheet stiagh ayn, as dy jinnagh eh dy jarroo greinnaghey dy chooilley pheiagh, my vees ad geearree gra veg mychione y ghowaltys geayee mooie veih'n choose dy gholl er linney gys Ørsted as dy gholl gys y halley baljagh bun-earrooagh as dy jean ad fakin ooilley yn yss ta Ørsted er hoilshaghey magh da sleih ayns ny taghyrtyn theayagh Jerrey Souree as Mee Luanistyn, as dy vel y form son cur stiagh barel ayns shen neesht, as t'eh briaght jeh sleih my sailloo dy chur stiagh nyn marel er yn oyr dy vel yn un aght foddee Ørsted ve freggyrtagh da caghlaaghyn ny aghtyn dy aa-heeley, shen my vees ny barelyn cheet stiagh oc dy chur oyr son jannoo shen.
Ta Mnr Galloway gra dy vel ny barelyn cheet stiagh er n'yannoo seose mestey yindyssagh jeh ve ayns foayr, as t'eh gra dy vel eh meanal sleih ve ayns foayr dy bollagh; ard 'sy vean jeh ve ayns foayr agh geearree toiggal tooilley mychione imneaghyn er-lheh, as dy vel shen mie, er yn oyr, cur roish ny cooishyn er-lheh shen, lhiggey da Ørsted cur-rish ad shen, as myr sampleyr t'eh gra hannah ayns ny caslyssyn oc dy vel Ørsted er hoilshaghey magh ny soilshaghyn stiuree er mullagh ny turbeenyn geayee mooie veih'n choose, ayns ynnyd jeh ny soilshaghyn jiargey ta shirrit ec yn Lught-reill Etlee Theayagh son oyryn sauchys.
Ta Mnr Galloway gra dy vel Ørsted er hoilshaghey magh y scenario jeh kiaddey 'syn aght smoo reesht, as shen dy vel feme er soilshey er dy chooilley turbeen. T'eh gra dy vel shen red ennagh as dy vel eh er Ørsted coardail rish ec date s'anmee, dy aa-heeley as dy treishteilagh dy yannoo ny sloo, er yn oyr dy vel eh jeh vondeish da Ørsted dy vel yn towse shen dy reddyn brishey stiagh er y chymmyltaght, agh reesht dy ve foshlit lesh sleih 'sy cho-choyrle theayagh dy vel feme er Ørsted soilshaghey magh y builley smoo as shirrey barelyn cheet stiagh ayn, as dy vel shen red ennagh, un sampleyr er-lheh jeh red ennagh t'er jeet magh ass.
Er-lesh Mnr Galloway dy vel ymmodee imneaghyn ayn, as er-lesh er-lheh mychione y choorse myr linney bea, as foddee dy vel sleih goaill yindys nagh nee imnea eh, cho mooar as v'eh lesh shaleeyn elley dy lhiassaghey ta shin er nakin ayns Mooir Vannin ayns kuse dy vleeantyn t'er n'gholl shaghey. T'eh gra dy vel Ørsted feer foshlit as dy vel eh geearree dy vel ablid ec sleih cur feyshtyn er yn oyr dy vel Ørsted geearree cur ad ny freggyrtyn as jannoo shickyr dy vel fys mie oc. Yiarragh eh dy vel yn possan s'jerree jannoo seose adsyn ta noi'n chalee, as dy vel shen ry hoiggal. T'eh gra dy nee treealtys eh bentyn da ny vees Reiltys Ellan Vannin geearree jannoo, as va geearree jannoo rish earroo dy vleeantyn, as dy vel Ørsted y lhiasseyder as ta'n bargane soiagh echey, as y colught vees cur bree da.
Ta Mnr Galloway gra dy nee'n chooish smoo scanshoil eh dy by vie leshyn jannoo shickyr dy vel dy chooilley pheiagh cheet er y jurnaa, agh dy vel eh ersyn soiaghey jeh nagh vel eh yn nhee dy vod eh cur-lesh dy chooilley pheiagh harrish ooilley yn traa.
As lesh Reiltys y Reeriaght Unnaneysit vees ayns foayr jeh bree vees aa-noaghey, foddee dy jean shen cooney lesh Ørsted neesht, er yn oyr, myr cheayll shin, dy beagh yn chooid smoo jeh'n lectraghys vees er ny ghientyn liorish Mooir Vannin creckit ayns margey y Reeriaght Unnaneysit, choud's veagh mayll as keesh ry gheddyn ec Reiltys Ellan Vannin.
Ta Benj Sykes jeh Ørsted gra, son Mooir Vannin, dy vel eh cheet fy yerrey gys yn obbyr vees goll er jannoo ec Ørsted ayns shoh, yn obbyr vees goll er jannoo ayns coloayrtys rish ny co-voodeeyssyn ain as roosyn as ta cochianglys oc rish y chalee, as rish ny politickeyryn neesht dy chur er y hoshiaght eh, agh son shickyrys dy vel eh cooneydagh dy vel monney jeh barel cooie er y chooish hoal 'sy Reeriaght Unnaneysit.
---oooOooo---
Ta Barrantee Phurt ny Hinshey cummal seose y yeearree phlannal dy hroggal boayl mooynlee ayns magheryn sheese liorish yn awin, erskyn y phurt hene. Ta Caairlagh y Voayrd, Christine Moughtin, gra dy nee shalee scanshoil eh son y valley, as dy jean y lught-reill ynnydoil cummal seose Bun-shirveishyn Vannin ayns shirrey kied.
Ta aghin noi'n yeearree er jeet veih shellooderyn y vagher liorish yn ynnyd treealit, as kied oc dy hroggal 21 thie ayns shen. Agh ta Bnr Moughtin gra dy vel cummaltee Phurt ny Hinshey er vuirraghtyn rish ny sodjey na 20 blein son aght dy eaysley y cront bentyn da mooynlagh 'sy valley, vees goll er pumpal magh aw 'sy vaie ec y traa t'ayn.
Ta Bnr Moughtin gra, lesh shalee cho mooar, dy vel eh ry yerkal rish dy jinnagh peiagh ennagh cur stiagh aghin noi echey. T'ee cheet er myr shalee feer, eer vooar. T'ee gra, veih cheu ny Barrantee, dy vel eh red ennagh as feme ec cummaltee Phurt ny Hinshey er dy debejagh 'sy heear, as dy vel ad cummal seose Bun-shirveishyn Vannin ayns cur shoh er y hoshiaght, dy vod ad cur rish ooilley t'eh orroo cur rish dy kiart, bee 'sy wyllin noa. T'ee gra dy row ad jannoo er shoh rish ny sodjey na feed blein, cur eab er geddyn boayl mooynlee ayns Purt ny Hinshey, as choud's ta'n balley lhiassaghey, dy vel tooilley mooynlagh dy chur rish neesht.
Ta Bnr Moughtin gra dy vel shoh shalee jeh wheesh scansh da Purt ny Hinshey dy jinnagh ee briaght jeh dagh ooilley oltey y Voayrd, ny co-Varrantee eck, dy ve maree ec y chlashtynys son yn aghin shen. T'ee gra dy beagh y plan shoh jiooldit, cre erbee yn oyr son shen, dy beagh ad jeeaghyn er goaill toshiaght reesht er yn clane stayd, as dy beagh oyr eh son ve mollit dy mooar, dy beagh feme er goaill toshiaght er y clane red reesht.
Bentyn da cummaltee Purt ny Hinshey, ta Bnr Moughtin shickyr dy bee'n aghin shoh cur imnea mooar orroo, as dy jinnagh ish guee er peiagh erbee, dy chummal seose yn immeeaght, as dy ghra dy vel shoh ny ta shin feme ayns rieughid, as dy vel feme ain er dy preaysagh ayns Purt ny Hinshey. Tee gra, derrey vees fys oc quoi t'er chur stiagh yn aghin – oddys eh y ve un pheiagh, oddys eh y ve lieh dussan dy leih – cha s'ain. T'ee gra, myr shoh, dy by vie lhieu dy jarroo fakin yn aght t'eh cheet magh, bentyn da'n aghin shoh.
---oooOooo---
Ta Christa Viohll ny arryltagh da Treisht Eiraght Rushen, as t'ee cooney lesh keayrtee dy ronsaghey jiass yn Ellan as t'ee gra dy vel ee goaill beggan dy nearey tra t'eh urree insh daue nagh vel barroose goll gys y Cheyllys. Ren ish reaghey son chaglym theayagh dy ve ayn ayns Purt le Moirrey yn chiaghtin shoh chaie dy loayrt mychione coayl yn shirveish earroo 28. Ren yn Rheynn Bun-troggalys feeraghey er y gherrid dy row eh geddyn rey rish y choorse eer yn oyr nagh row argid dy liooar ry gheddyn ass, lesh yn earroo dy hroailtee tuittym dy mooar neayr's 2019.
Agh yn vee shoh chaie va olteynyn Tinvaal cremmey y Rheynn, lurg da'n stayd shoh cheet magh lurg aghin rere seyrsnys fysseree.
Ta Bnr Viohll gra dy row daa oyr er-e-son reaghey y chaglym. Hoshiaght t'ee gra dy bynney lhee y Cheyllys as dy vel ee yn reih-voayl eck as nagh vel gleashtan eck, myr shoh nagh vod ee hene cosney gys shen as dy beagh taxi son un pheiagh ro chostallagh. Agh t'ee gra dy vel yn oyr smoo, shen dy vel ee ny harryltagh da Treisht Eiragh Rushen, as dy vel ymmodee plaiyntyn daue nagh vel barrooseyn goll gys Cregneish, as dy vel eh er ny harryltee cur-rish y keayrtagh tarmestit.
Ta Bnr Viohll gra, lurg paart dy hraa, lurg jee jannoo eh rish daa vlein nish, t'ee skee jeh, er yn oyr nagh vel eh veg da ny harryltee, cha nee lhieusyn ta'n foill, agh son shickyrys dy vel beggan dy nearey oc myr cummaltagh as by vie lhee cur-lesh ad gys shen, er yn oyr dy vel eh fer jeh ny ynnyd eiraght smoo scanshoil ain. T'ee gra myr shoh nagh row veg taghyrt dy oikoil ny ayns aght goaill chymmey, myr shoh dy row ee smooinaghtyn dy row feme er sorch ennagh dy ghleashaght bunnidagh.
Ta Bnr Viohll gra dy row ee goaill yindys, nagh row ee jerkal rish whilleen sleih dy heet, agh dy vel shen soilshaghey magh dy vel sleih gennaghtyn shoh dy mooar as dy vel sym ec sleih er y chooish dy jarroo, as nagh vel ish yn un pheiagh ta skee jeh shen. T'ee gra dy vel red elley ta brasnaghey sleih, ta kaartyn troailt Bus Vannin gra dy vel sleih abyl dy gholl gys Cregneash as neesht goll er y varroose, as dy row kuse dy leih nyn shassoo as fuirraghtyn er ny barrooseyn, as briaght j'ee c'raad ta'n barroose gys Cregneash, as adsyn cowraghey magh dy vel eh gra er y chaart dy vod ad goll gys shen, myr shoh cre'n aght foddee ad cosney gys shen.
Ta Bnr Viohll gra dy row cubbyl dy leih va feer chorree gra nagh row Ellan Vannin geearree agh nyn argid, as cha nel ad boirit vel shin abyl dy chosney gys shen ny dyn, as er-lhee dy vel shen oyr dy feer son goaill nearey. T'ee gra, my vees shin geearree reaghey red ennagh er shoh, dy vel feme er jeeraghyn orrin hene, ny cummaltee, er ny vees ry yannoo ain, er yn oyr dy nee baghtal eh dy vel red ennagh elley, as fys eck dy row mooarane eab ayn, ren Ynnyd Eiraght Rushen cur eab er jannoo red ennagh, agh dy by vaghtal eh nagh vel y saase oikagh cooilleeney veg.
Ta Bnr Viohll gra nagh ee jerkal rish veg veih oik ny veih cre erbee, as er-lhee dy vel eh orroosyn ny cummaltee dy gheddyn magh red ennagh dy eaysley y stayd rieugh t'ayn.
Kionefenish va Oltey yn Chiare as Feed son Rushen, yn Doctor Michelle Haywood. T'ee gra dy ren ny giarragyn goaill toshiaght lesh Covid, as nagh ghow eh toshiaght reesht dy kiart lurg shen, as eisht dy vel shin clashtyn veih'n Rheynn Bun-troggalys nagh vel immanee dy liooar ayn, nagh vel barrooseyn dy liooar ayn, dy vel eh coayl argid. T'ee gra dy vel bunnys dy chooilley shirveish varroose coayl argid, agh ayns rieughid dy vel ad gobbraghey myr shirveish, as dy vel bun ny cooish, dy vel shen paart jeh'n shirveish. Er-lhee, myr shoh, dy vel ymmodee oyryn er jeet stiagh 'sy chooish shoh, as nagh row ad rieau ayns rieughid cur toshiaght er reesht. T'ee gra, my vees ad goaill toshiaght er shirveish paart-hraa as dy vel ad stiurey ee rish oor ny ghaa as ec y chione shiaghtin ynrican, as nagh vel oo cur magh fys mychione shen, son shickyrys cha jean peiagh erbee ymmyd j'ee, as eisht son shickyrys ta ny earrooyn jeeaghyn dy ve injil, as dy vel eh cheet dy ve faaishnys vees cooilleeney ee hene.
Ta'n Doctor Haywood gra, er jerrey y varroose, as dy amlagh dy liooar eh, ec y traa t'ayn, ta reayrt jeh'n Cheyllys, cur er y hoshiaght dy vod sleih jannoo ymmyd jeh kaart troailt dy gholl mygeayrt yn Ellan, as she un voayl 'syn Ellan nagh vod oo roshtyn er barroose, as nagh vel eh agh bolvaneagh. T'ee treishteil dy vod ad goll back gys yn Rheynn as briaght yn aght dy chur er shoh gobbraghey, as cre'n aght feayslee vees ry gheddyn ain. T'ee gra dy jinnagh ee greinnaghey dy chooilley pheiagh dy vel co-choyrle theayagh ayn mychione arraghey ec y traa t'ayn, dy chur stiagh ny barelyn oc 'sy cho-choyrle theayagh shen, as dy vel eh goll gys mean Mean Fouyir, myr shoh dy vel kuse dy hiaghteeyn dy chur stiagh barelyn foast.
---oooOooo---
Ta tuarastyl noa veih Coonceil ny Shirveishee gra dy lhisagh broddyn ve currit er bun as yn dean jeu dy gheddyn rey ny dy yannoo ny sloo lhiettrimmyssyn er obbreeyn veih cheumooie jeh'n Ellan ta smooinaghtyn mychione cheet dy vaghey ayns shoh. Ta'n tuarastyl, Oyryn Greinnaghey as Oyryn Neu-Ghreinnaghey Ymmyrkey Stiagh Ayn, er ve clouit, ayns biallys da aigney Tinvaal Mee ny Nollick 2023. As t'eh soilshaghey magh foddee dy vel deanyn y Reiltys foast ass roshtynys. Ec cree Strateish Tarmaynagh y Reilts ta ard yeearree dy chroo as dy lhieeney 5,000 startey noa ayns kerrooyn ard-scanshoil, liorish 2032, as cheet gys Lane Troar Sthie jeh £10 billioon. Ta ard yeearree elley dy lhiassaghey ny sodjey bun-troggalys as shirveishyn theayagh dy phlannal son pobble ta'n reiltys gooley dy ve femoil son shoh jeh 100,000 dy leih liorish 2037.
Agh ta'n tuarastyl noa soilshaghey magh nagh vel pobble yn Ellan er vishaghey agh liorish 461 peiagh eddyr y coontey pobble 2021 as 2023. Eddyr Mee Voaldyn 2021 as Mee Voaldyn 2023, ren 3,705 peiagh ymmyrkey stiagh 'syn Ellan, agh tra ta geill currit da ymmyrkey magh 'sy traa cheddin, va shen 2,709 peiagh, as lesh earroo ny sloo dy leih ruggit na dy leih geddyn baase, cha ren y pobble bishaghey agh liorish 461 peiagh eddyr yn daa hraa shen.
Dy jarroo, ta'n beoyn shen tannaghtyn ayn, dy vel earroo ny sloo dy leih ruggit na vees geddyn baase. Shoh er yn oyr dy vel ratio croghaneagh ny syrjey as pobble vees ny shinney na ta ry gheddyn ayns ny naboonyn sniessey dooin, as dy vel shen cur preays er y vargey obbree choud's ta tooilley sleih cheet dy ve nyn daue as earroo sloo dy leih goaill toshiaght er obbraghey. Shoh yn oyr ta Coonceil ny Shirveishee gra dy vel ymmyrkey stiagh ayn lane femoil dy chummal earroo y phobble myr t'eh 'sy traa giare as dy chooney dy chur er y veoyn shoh caghlaa dy ve'n tro elley 'sy traa sodjey.
Eddyr lieh-raad trooid ny 1980yn as lieh raad trooid ny 2010yn, va pobble Ellan Vannin goll seose dy rea, as va'n oyr smoo son shen yn earroo smoo dy leih jeh'n eash dy ve gobbraghey va gymmyrkey stiagh 'syn Ellan dy obbraghey 'sy jeadys va gaase ayns shirveishyn argidoil. Agh er yn oyr dy vel yn sleih shoh er jeet dy ve ny shinney, shoh ry akin 'sy chorrillagh vees cheet dy ve ny smoo jeh pobble yn Ellan jeh eash dy ve nyn daaue as cumrail 'sy chorrillagh jeh'n phobble jeh'n eash dy obbraghey, as magh ass shen ta ratio croghaneagh yn Ellan cheet dy ve ny smoo. Ta feme preaysagh son tooilley obbreeyn ayns ymmodee ayrnyn y tarmaynys.
Ta'n chooid smoo dy leih (75%) jeusyn ta gymmyrkey stiagh 'syn Ellan trooid cassanyn ymmyrkey stiagh jannoo shen, vel shen dy jeeragh ny dy neu-jeeragh, myr eiyrtys jeh failley. Va'n earroo dy chied obbree coardit 2022 yn earroo syrjey va recortit, choud's ta 2023 tannaghtyn ard cosoyley rish ny bleeantyn as Covid ayn, 2020 as 2021, agh fo'n earroo 2019.
She 0.6% va'n rate dy vee-startaght Mee Voaldyn 2024, as shen bunnys yn red cheddin as 'sy vlein roish shen (0.5%). Agh ny yeih shen, ta ny shlee na 1,000 startaghyn follym 'sy rolley, as 4.5 startey follym son dagh shirreyder startey v'ayn 2023, lesh tuarastyl foddey skeaylt jeh doilleeid ec failleyderyn feddyn olteynyn son ny fwirranyn oc.
Myr eiyrtys jeh'n phobble cheet dy ve ny shinney, ta'n varney eddyr yn earroo dy ruggyryn as yn earroo dy vaaseyn er ve jiooldagh son dagh blein neayr's 2014. Cosoyley rish ny naboonyn ain jeh'n sorch cheddin, Guernsey as Jersey, ta corrillagh sloo dy leih ayns shoh jeh'n eash dy obbraghey as corrillagh smoo dy leih ta 65 blein dy eash ny ny shinney, as rate sloo dy ruggyryn. Ny smoo na shen, ta sleih gooley dy jean yn earroo jeusyn 'syn Ellan 85 blein dy eash ny ny shinney gyrjaghey liorish 20% ayns ny 25 blein shoh cheet, myr eiyrtys jeh pobble dy chummaltee ta cheet dy ve ny shinney.
Dy yannoo seose doilleeid elley, t'eh jeeaghyn nagh vel adsyn ta gymmyrkey stiagh ayn dy kinjagh tannaghtyn ayns shoh. Ta data 'sy tuarastyl soilshaghey magh dy jean mysh 35% jeusyn ta gymmyrkey stiagh 'syn Ellan faagail reesht cheusthie jeh 5 blein neayr's y traa t'ad cheet dy ve nyn gummaltee. Bee mysh 45% jeu ersooyl lurg 10 bleeaney, 35% lurg 5 blein, as bee 20% jeu ersooyl lurg daa vlein.
Ga dy vel yn rate sinshley ec Ellan Vannin dy ruggyryn, cosoyley rish Guernsey as Jersey, ta'n corrillagh smoo echey dy phaitchyn (shen dy ghra adsyn eddyr neunhee blein as 15 blein dy eash) dy phaitchyn cosoyley rish y clane pobble. Foddee dy vel shoh soilshaghey magh dy vel lughtyn-thie as paitchyn oc ymmyrkey stiagh 'syn Ellan. Ta'n tuarastyl gra y vel yn earroo mooar dy phaitchyn as ta kied currit daue dy heet stiagh ayn soilshaghey magh dy vel lughtyn-thie aegey cheet mennick dy liooar gys yn Ellan veih cheumooie jeh'n Cho-ard son Troailt.
T'eh gra neesht, choud's ta'n Reiltys goltaghey yn earroo shoh dy leih aegey vees gymmyrkey stiagh ayn myr cur gys yn aght foddee yn Ellan cummal seose eh hene 'sy traa ry heet tra nee ad shoh, tra t'ad fir aasit, gobbraghey ayn shoh, dy vel eh cur preays er coarys ynsee yn Ellan chelleeragh. 'Sy vlein argidoil 2022-23 ren yn Rheynn Ynsee, Spoyrt as Cultoor recortey 325 dy leih haink stiagh ayns bunscoillyn as scoillyn ard dy neu-yerkit, as ec paart jeu va Femeyn Ynsee Elley. Ta'n tuarastyl cheet er yn sleih neu-yerkit shoh cur preays elley neu-femoil er couyryn yn Rheynn, as er-lheh er yn oyr dy vel ymmyrkey stiagh cheet son y chooid smoo gys hiar as jiass yn Ellan, as er coontey shoh dy vel eh cur preays er scoillyn ayns ny ardyn shen, choud's ta ablid erskyn shoh ayns ardyn elley dy reirey bishaghey 'syn earroo dy studeyryn.
Ta Coonceil ny Shirveishee cheet er buillaghyn jeh ymmyrkey stiagh ayn myr doillee dy chur earroo ny costys er. Bentyn da kiarail slayn, t'eh gra nagh vel eh possible dy howse dy jeeragh y builley, er coontey yn aght ta ny data bentyn da sleih recortit lesh fir lhee chadjin goll er freayll, as corrillagh ard dy recortyssyn scaanjoonagh faagit 'sy choarys, ga nagh vel sleih foast jannoo ymmyd jeh ny shirveishyn – ta shin er vakin hannah y corrillagh dy leih t'er jeet stiagh ayn ta faagail lurg daa vlein, queig blein, jeih bleeaney. Agh ta'n tuarastyl gra dy vel sleih ta goll er failley ayns kerrooyn lhee as kiarail slaynt jannoo seose 18.9% jeh ooilley ny startaghyn vees goll er cooilleeney liorish sleih t'er nymmyrkey stiagh ayn.
Bnentyn da thieys, ta Coonceil ny Shirveishee gra dy vel sleih er jeet er imneaghyn , ec y chooid sloo trooid skeealyn, mychione sleih cheumooie jeh'n Ellan kionnaghey thieyn myr aght dy vaih argid as cosney argid dauesyn hene, as dy row shen jannoo ny s'doillee yn aggyrt son thieyn. Agh t'eh gra dy vel fysseree veih'n Recortys Thalloo soilshaghey magh nagh vel agh 1.5% jeh thieyn er ve kionnit ec sleih cheumooie jeh'n Ellan as nagh vel eh foue cummal 'syn Ellan cheusthie jeh 6 mee, neayr's va tailley son jannoo recortys currit er bun Mee Boaldyn 2023. Agh t'eh gra neesht dy vel y tailley goll er cur ynrican my vees peiagh ennagh fograghey magh y chooish, as myr shoh foddee dy vel yn earroo ayns rieughid ny syrjey.
Ayns ayrn elley y tuarastyl, ta Coonceil ny Shirveishee gra dy vel feme er reaghey saaseyn dy ghreinnaghey as dy neu-ghreinnaghey ymmyrkey stiagh ayn vees freggyrtagh da obbyr s'lhea dy hareaghey yn aghtbeaghee ec dy chooilley chummaltagh. T'eh gra, tra ta reaghys jeant dy ymmyrkey stiagh ayn, dy vel reayn dy oyryn cochianglt rish shen, vees goaill stiagh cochianglyssyn rish mooinjer; vel thie ry gheddyn; caaghyn son cheet dy ve faillt; sauchys as shickyrys; mieys yn aghtbeaghee; as y costys vea (goaill stiagh keesh), agh ta tosheeaght jeant jeusyn shoh, as jeh oyryn elley, ec dagh fer er-lheh.
Myr sampleyr t'eh cheet er y corrillagh mooar dy liooar dy phaitchyn (veih neunhee gys 15 blein dy eash) ta nyn lhie er Obbreeyn ta Ymmyrkey Stiagh ayn soilshaghey magh dy vel corrillagh mooar dy liooar dy leih ta gymmyrkey stiagh ayns lughtyn-thie as paitchyn oc, as dy by lickly eh dy vel sleih myr shoh jeeaghyn er sauchys as mieys yn aghtbeaghee myr tosheeaght 'sy reaghys oc.
Ta'n Coonceil gra dy vel ad shoh cooishyn as bentyn daue ta'n Ellan ry akin myr lajer, er coontey y rate injil dy chimmeeys, traaghyn giarey goll huggey as veih eddyr yn thie as boayl obbree as aalid ny reayrtyn t'ayn.
Noi shoh t'eh gra dy vel oyryn nee cur peiagh ennagh veih ymmyrkey stiagh 'syn Ellan. Liorish jeeaghyn er creearyn ny mast'ocsyn t'er n'gheddyn argid er eeasaght ny myr toyrtys dy ve nyn studeyryn, ta kuse jeu fakin gennid dy chaaghyn 'sy choorse reiht ec, gennid dy hieys vees ry fordrail, caaghyn sheshoil boghtey as costys ard dy hroailt huggey as veih'n Ellan.
Ta Coonceil ny Shirveishee gra dy vel ad jeeaghyn er kuse dy haaseyn dy ghreinnaghey sleih dy ymmyrkey stiagh ayn ny dy heet back gys yn Ellan lurg daue jannoo studeyrys, as dy vel ad shoh goaill stiagh Leih da Studeyryn yn Argid er Eeasaght daue (ny yeih dy vel ad jeeaghyn neesht er saase elley,as shen liorish cur costyssyn elley er studeyryn nagh vel cheet back gys yn Ellan). T'eh jeeaghyn er ceau ny taillaghyn son visa erbee vees femoil ec sleih; cur cooney daue bentyn da kionnaghey thie ny geddyn thie er mayll; as jannoo ny sassey y cheeayl chionnit cochianglt rish ymmyrkey stiagh ayn.
As eisht ta'n Coonceil jeeaghyn er aghtyn dy neu-ghreinnaghey sleih, myr shoh t'eh smooinaghtyn mychione caghlaaghyn 'syn aght ta sleih geddyn entreilys da shirveishyn theayagh as Cooney Cadjin Argidoil 'sy choarys Kiarail y Theay, foddee liorish cur er bun tailley elley son kiarail slaynt er nyn son ta cheet stiagh ayn; ny liorish caghlaa yn aght yinnagh sleih ta cheet stiagh ayn geeck Urryssaght Claynt; ny liorish cur tailley er-lheh er dagh cummaltagh noa.
Bentyn da entreilys da thieys, ta'n Coonceil smooinaghtyn er tailley er-lheh dy recortey thie t'ec peiagh ennagh mannagh vel y peiagh shen gobbraghey, as ny smoo na shen, er saaseyn leighoil dy ghurneil entreilys da thieys as shirveishyn theayagh.
Ta tuarastyl Coonceil ny Shirveishee gra dy vel obbyr foast ry yannoo 'sy traa ry heet, as t'eh cheet er Coarys Recortey Cummaltagh Noa, dy yannoo shickyr dy vel yn Ellan cur cooidjagh as rheynn data dy liooar er rheynnyn y Reiltys dy reirey bishaghey 'syn earroo dy leih ta gymmyrkey stiagh ayn, as dy yannoo shickyr dy vel adsyn ta gymmyrkey stiagh ayn goll er pohlldal dy vel ad tannaghtyn ayns shoh 'sy traa sodjey.
T'eh gra dy vel obbyr ry yannoo neesht ayns aa-scrutaghey ny cassanyn son sleih ta gymmyrkey stiagh ayn, er yn oyr dy vel barney eddyr reillyn er entreilys da'n Reeriaght Unnaneysit as er entreilys da'n Ellan, as magh ass shoh dy vel yn Ellan ayns gaue jeh ve fakinit myr 'dorrys ny cuillagh' da'n Reeriaght Unnaneysit, as dy vel feme er y choayrys son ymmyrkey stiagh 'syn Ellan ve lajer dy liooar dy chumrail mee-vondeish goll er jannoo jeh sleih currit dy laboragh liorish possanyn y chimmeeys reaghit. Bentyn da shoh, nee ad ronsaghey yn eie jeh cur costyssyn as cooney cadjin argidoil cochianglt rish ymmyrkey stiagh 'syn Ellan dy ve'n red cheddin as 'sy Reeriaght Unnaneysit.
Nee olteynyn Tinvaal resooney magh y tuarastyl shoh Jerrey Fouyir. Ta'n tuarastyl gra dy vel polasee foast goll er lhiassaghey as nagh vel shoh agh keim interim. Ta loayreyder ass lieh Oik Coonceil ny Shirveishee gra dy bee caa da olteynyn cummal slane resooney magh er y tuarastyl as nagh row eh geearree cur eab er cheet er eiyrtys y resooney magh shen.
